A Bible Ko Hi A Mak: Vice President Kamala Harris Hoi Hna Cu Bible Pakhat Lawng A Zaa Lo Bible Pahnih

Joe Biden te chungkhar Bible ca ko hi a mak taktak. Hlaan lio chan rang le Vainam tehna he ral i tuk lio chan in an rak ngei cang lai cu. Nam nih kheng sual hlah seh tiin Thir (vailam tah cuang) he a kham nak an tuah chih rih. Vice President Kamala Harris hoi hna cu Bible pakhat lawng a zaa lo Bible pahnih cungah a kut nam in biakam nak a tuah ko. Biakam nak an tuah dih hnu i thluachuah a pe mi Pastor thlacam ko kha a hallelujah au daan hmanh vawlei a kan hninh dih.

Asi nain Ramkhel rian le Biaknak rian kha tha tein an then. An cawh lo. An lung chuak poh Pathian bia an chim fon lo. Mi an nawnok fon hna lo. Joe Biden nih 46nk US President biakamnak a tuah lio i a ken mi Bible cauk ko hi zoh ko tuah hna usih. Kum 1893 in an chungkhar nih an rak hman cang mi. Kum 128 a rau cang mi. Sui tlang chiah in Pathian bia cu an in chung ah kum za leng an i chiah ko hih. A pa, a pu, a pu i a pa tiin a chan chan in an rak rel cang mi. Dai tein khin mi hmai ah a bikin media hmai hna ah mah hi ka ngei, mah hi ka rel mi asi a ti bel lo. An chungkhar Bible an i fim kum ko hi tuak ahcun kan Khrifa sinak kum hmanh nih a phaan kho rih rua lo.

Pakhat pa belte cu BLM caan lio ahkhan Biakinn ava kal zok zok ve. Bible cu a ken. Hman a thlak lai ahkhan a bible ken daan hmanh a laptalei in asi i an chimh zokzok than ruang ah aw a ti i cu ti cun mirh nawn tein hman a hei thla. Aa lung si ngai ko rua. A chan chung a philh lai lo dah. Philh awk tha ve lo- US phunghrampi tiang cupei nawn nok dih a timh cu. Hmai lei ahcun sianginn ah siahngakchia nih ca in an cawn lai. Siahngakchia nih an huat taktak hoi lai. Huat a tlai bikmi le a sual bikmi President asi ko cang lai. WH a chuah tak nak caan hman lio a naupa nih a thlah duh lo kha. Biden he Biakinn ah an va pum ti ko kha.

Tu ah Trump zultu pawl QAnon bu anti maw kha ? mah phu chungtel a simi Capitol Inn chung ah Saki le Savun hruk-aih in a rak lut mi pa hoi hna kha thawng in chung tiang a duh a san ter bak rih. Organic lo cun zei hmanh ka ei duh lo ti in a tler khong a zai pa rih. Tu ahcun mah bu pawl hi an vaivuan dih hnik. A kan hlen dih ti asi cang. Trump tu in lam fanh an timh cang. QAnon bu i chungtel pakhat hoihna nihcun president thim mi le kan constitution cu kan upat ding asi ati (NYTimes).

A zei poh si ko seh “Adongh nak ahcun Democracy nih a tei ti asi ko”. America ah Democracy nunnak a leng than cang. Democracy khua a dei cang an ti. A ni uar tuk cang. Ruahchan nak nganpi he a ram fa pawl zing ka nikhua dawh an hmu cang. Kan kawlram belte election kong ah angki hring le hni hring pawl an i buai ter len rih ko. An caah khua ci a mui. tuah awk an thei lo. statement he lawhmachet tiin an chuah. An i palh ah le computer tial tu sual an phawt. Khua ruah har taktak an si ve.

Kan ram zong kan miphun hruaitu hna nih an timh mi le saduhthah a simi, mipi nih kan duhmi “Democracy nunphung le Federal ningcang in i hruainak” leng ve cang ko seh. Ca tial hi a nuam: tanh hlei a ngei mi ca belte ahcun mah duhnak zawn ah a thlum i duh lonak ahcun a kha in a kha. Ca ttialtu: Beizachhi Joxa

Leave a Comment

Leave a Reply

Your email address will not be published. Required fields are marked *