Nizan ah Alz Kz timi facebook account hmangtu Kawlpa nih Mandalay thawngpang phuntlin timi facebook group ah mizaw siikhan a phan siikhan tuanvo ngeitu hna nih an thawp duh lo caah a thihnak kong cu a video he hmanthlak he a tarlangh. Cu post ah ca tial chihmi cu a tanglei bantukin a tial.
“Hi ngakchia pate hi a kut ah phaisa thonghra aa put i zinglei suimilam 4 am (2020, September 4) ah siikhan a phan cang. Zinglei suimilam 6 ah a nunnak a liam. Zeihmanh thlawpbulnak an tuah piak lo. Siibawi timi cu mizaw thlawp ding a si lo maw? Zawtnak ttih in maw mizaw a zoh sawh lai?
Siikhan chungah a thal in a it a thi ko. Siizung pi kuat ding ah (suimilam 2 chung) caan zong an ngeih ko. Nain ihkhun hmanh ah ihter loin zelttuangah a ril ko buin a zoh sawh ko. Sii durkhat te a lak in chunh piak in a nunnak ven khawh a si ko buin sii dur pakhat te zong an chunh piak duh lo.
An chunh ngam lo ahcun siikhan tuah/on ding an si lo. Chim duhmi cu thiam lo ahcun sii thlawpnak in pawcawm lo ding a si ko. Mipi kan tuar. Hi ngakchia pate hi zei zawtnak in a thi timi hmanh an thei lo. A taklinh (temperature) hmanh an tah piak loin ttuang cungah an ril ko buin an zoh sawh” tiah caption a tial chih.
Alz Kz nih a tang comment ah address a tial thanmi cu hi thil cang hi Mandalay myo, Chanmya Tharsi myone, No. (5) sang i inn number 3/119, Monmyat siikhan a si. Keimah pumpak nih siibawi cu ka chawnh. Amah cu Seh-hmuh siikhan ah a um caah tuanvo ngeittu saya a um ko a ka ti. A thih hnu lawng ah a ruak pawng ah siibawi a phan. Cu hmanh cu aa dawh cah lo a ti caah a rami a si. Palik an phan hnu lawng ah a ra” tiah thil sining tling deuh in a tial than hi a si.
“Hi bantuk siikhan pawl hi tha tein dantat ding an si. Mizaw an thlawp duh lo le an thlawp ngam lo ahcun tuanvo ngeitu hna sin theihter in siizung pi hna ah an kuat awk a si. Minung nunnak zei rel lomi nih siibawi tuan in pawcawm an duh rih. Siibawi min, siikhan umnak address tling tein tial chih law, cu lawngah mipi nih an hrial khawh lai” tiah Pyi Chit nih comment a tial caah a tangah siikhan address tlin tein an tial than hi a si.
A video zoh chihnak VIDEO
Source: Alz Kz (FB)
Leave a Reply