Nihin August 30, 2020, chun suimilam 12:30 pm ah Yangon ramthen, Mingaladon myone, Zay Kabar-wan sang, Swedaw City inn-za hmai i Mohsoema hlei pawng ah Okkan in a fanu umnak ah ei din ding a rak chanhtu pa cu a motorcycle aa let i thingkung a pah sual caah a lu aa khawn i a hmun ah a nunnak a liam tiah theih a si.
A pawngkam i a ummi khuami hna nih Mingaladon myoma police station ah theihternak an tuah i palik phu nih cun Pale fire force phu bawmh an hal chin hnuah a ruak cu Me-da-wi siizung ah an kuat tiah theih a si.
A thi pa cu U Htun Htun a si i kum 37 minung, Okkan khuami a si. A fanu rawltam in a um sual lai ti phan ah a fanu ei din a va chanhnak ah tu bantuk a cangsual i a nunnak a liam hi a si. Cucaah U Htun Htun cu a sining a theitu hna nih a fanu caah a nunnak a pek i a ttuanvo a tlinh ko tiah an upatnak cu source nih a langhter.
Kawlram ah motorcycle cangsual hi a tam ngai. Nihin August 30, zanlei suimilam 3:40 pm hrawng zongah Mawlamyine myo, Yadana Mon siizung hmai ah zu rit buin motorcycle a monghmi pa nih motor pakhat a pah sual ve.
Cu cangsualnak ah motorcycle aa citmi pa pakhat le nu pakhat hliamhma fak an tuar i Mawlamyine Rescue phu nih siizung an an kalpi tiah theih a si. Zu ri buin motorcycle a monghmi pa cu PK pawl nih kherhhlainak an tuah lio ti zong in theih a si.
Ref: ZM
Leave a Reply