A Poi Kho Tak: Nurse Nute Kovid Zawtnak In A Nunnak A Liam

Kawlram chung cu nikhat hnu nikhat in Kovid mizaw an karh thluahmah bantukin a thimi zong an hung karh ngai ve cang. A thimi lakah tu zing cu nurse a tuan liomi nungai note pakhat zong aa tel ve tiah theih a si.

Amah cu Bahorsii in Nurse a tuan cuahmahmi a si. Amah cu Ayerawaddy ramthen, Pantanaw myone, Mintasuh khua oksu, Kyaung khuami U Aung Zaw Linn le Daw Khin Htay Yi hna i an fanu upabik, Mah Yin Yin Nwe unu Mah Khin Myo Thu (kum 23) nungak note a si.

A thih hi nihin September 18, 2020, zinglei suimilam 10:40 am ah Yangon Pyithut siizung aah a thi tiah theih a si. Nurse a tuan liomi mi nih bochan ngaimi pakhat a si tikah hrintu a nulepa le Kyaung khuami hna cu an ngaihchiat khun tiah source nih a tarlangh.

Kawlram chung ah Kovid mizaw zohkhenhtu nurse pawl a zawmi an um pah cang tiah theih a si. Pyi ihkhun 500 tlum siizung zongah ICU room ah chiahmi pawl zohkhenhtu nurse nute pakhat cu nihin ah Kovid positive a si ve tiah hluttaw palai U Kyaw Zay Ya nih a chim.

Kawlram cu a luancia thlali thlanga chung ahkhan cu Kovid aa runven khomi tiah thangthat ngai an si nain tu thla thawk in biatak tein a karh than tikah nihin September 18 ni tiangah Kovid mizaw dihlak hi 4,299 an si cang.

Hi hi Kawlram chung case dihlak a si i hi chungah minung 944 an dam thang cang. Kovid zawtnak in a thimi dihlak hi 61 an si cang. Cu chungah Nurse tuan lio Mah Khin Myo Thu zong aa tel ve hi a si.

Ref: Myaelat Tharlay

Leave a Comment

Leave a Reply

Your email address will not be published. Required fields are marked *