Vawlei min ruangah a tlawmbik ralkap 22 an tlau tiah theih a si. Central Vietnam ram, Quang Tri Province ah nihin October 18, zinglei sangah vawlei a min in a tlawmbik ralkap 22 an tlau tiah an cozah lei nih an phuan. DVB nih atarlangh.
Ralkap a tlaumi hna chung in mithi ruak 3 an hmu cang tiah cozah lei in an phuan nolh than. Nihin ralkap pawl an tlaunak hi daihnak um chung (raldohnak um lo lio) ah ralkap tambik an tlau a si tiah theih a si.
October thla hramthok khan rua a sur i ti alian caah central Vietnam ram hrawng cu ti a lian pinah vawlei hna a min chih caah minung 70 leng an thi cang tiah theih a si. Hi hnu ni tlawmpal ah hmasa nak hmanh in rua a tam deuh kho tiah ruah damh a si.
Tutan vawlei minnak ah a tlaumi hna cu No. 4 ralkap batalian chung in an si tiah Vietnam cozah lei nih an phuan. Quang Tri Province pawng i Thua Thein-Hua Province zongah vawlei minnak ruangah ralkap 13 an thi cang.
Quang Tri Province chung i tiva pawl cu kum 30 chungah a lianbik caan a si tiah cozah media nih an phuan. Central Vietnem cu a ralaimi October 21 ni ah ruah tahnak 60 Centimeter tiang a sur rih kho tiah khuacaan zohthiam hna nih nihin October 18 ni ah an phuan. DVB nih a tarlangh hi asi.
Ha Tinh, Quang Nam, Quang Binh, Quang Tri, and Thua Thien-Hue provinces le Da Nang City hna chung in inn singkhat (100000) leng cu ti nih a khuh dih hna ti si. Cucaah The Ministry of National Defense lei zong nih ralkap, palik le mipi volunteers 9600 sawm in an zuang hnawh hna tiah theih a si.
Leave a Reply