Royal City siizung ah riantuantu upabik in ngakchiabik tiang mizaw nan thlawp i minung nunnak nan khamhmi rian hi a sunglawi ngaimi rian a si. Kan upat tuk fawn hna. Cu pinah nan rian hi fihnung ngaimi mizaw thurhnawm tonghtham rian a si tikah thluachuah conak zong a si. Nain tutan kan thil tonmi pakhat ruangah siizung riantuantu nan dihlak sin chim ka duh.
Kan tupate cu nai October 19, 2020, zanlei suimilam 5pm hrawngah ngandam tein Royal City siizungah a chuak. Nain nihnih hnu ah ngakchia cu tak-eng zawtnak a ngei caah electric mei em ding in siizung ka panh than. Ngakchia cu voithum electric mei em ding a si i, a voithumnak cu nizan October 22, zanlei suimilam 5pm hrawngah an em. Cu lio ah ngakchia cu voi dang bantuk ihter loin a bawk in an bawhter.
Cu ti cun ngakchia cu mei em hram an thok bak in a aw thehreng chuak in a tap colh i nithum ngakchia lawng a si rih tikah a tap aw a theitu upa hna zong an celh ve lo. Cu ti cun ngakchia cu a nunnak aa chang buin minute 15 hrawngah a tap aw a dai. A tap aw theih a si ti lo tikah a tapnak ah a ba caah aa hngilh si lai tiah an ruat i a um sawh ko. Nain a hnuah ngakchia nunnak a liam tiah ngaihchia ngai in theih a si.
Siibawi hna le nurse hna caah cun minung pakhat nunnak thaw cat hi aa phundang tuk lem lai lo nain kanmah caah cun kan cohlan khawh lo dingmi thil a si. Ngakchia pakhat kan ngeihchunmi a si tikah kan tuar khun. Ngakchia hi ngandam loin a chuakmi va si sehlaw kan lung kan isak kho deuh hnga. Atu cu a chuak lioah a nu siseh, ngakchia siseh dam tein an hmai aa hmumi an si.
Nunnak thinphang ding um lo ding in zeiruangah timhtuahnak nan ngei lo? Ngakchia cu chim lo, upa hmanh minute 15 chung bawktakhup in kan it ahcun kan thaw a pit. Tuanvo ngeitu hna nih zei bantuk cawnnak le hmuhtonnak he mizaw an zawh hnga timi hi keimah mi sawhsawh pakhat sinak in ka tuak kho lo i, ka cohlan kho lo. Zohkhenh (service) tha kan duh caah Private siizung ah nau kan ngeihmi a si. Phaisa kan ngei tuk caah private siizung le siikhan kan fuhmi a si hrim lo. Kan ngeih lo na buin nanmah le nan riantuannak kan in zumh hna caah kan in fuh hna.
Hi tluk in kan sunghnak ruangah nan siizung nih zeitin tuanvo nan lak lai timi nan ruah awk a si. A zatawk in phaisa nan kan lak ahcun a zatawk in nan kan zohkhenh (service) ve awk a si. A fapa thih ruangah zun tuar liomi hrintu a nu na palh ko, kanmah he zeihmanh aa saing lo ti phun in a thinlung nan fahter chinchin awk a si lo. A hnuah ngakchia tak-eng zawtnak a ngeimi mei-em ding nan ngeih than kho. Nain tu bantuk nan palhnak kongah tuanvo kan ngei timi ruahnak nan ngei khawh lomi hi ka khuaruah a har ko.
Adonghnak ah fa a ngei cangmi nu le pa kip nih a chung chuak fa zun a tuarmi caah nan ka theih thiam lai ka zumh. Royal City zong nih upatnak he kan nawl uh ti ka duh.
Note: Kawl ca an tialmi aa tlak ning in leh chinmi a si.
Credit: Mai Goretti Tial
Leave a Reply