Magwe ramthen, Ngape pengkulh, Zin Phyun Ohsuh Ma Kyi Kung khua ah Kawl phungki pakhat nih Chin nu kum 13 tleirawl nute a sualpi ruangah Phungki pa cu report an tuah cang tiah theih a si.
Hi thil hi October 9, 2020 ni ah a cangmi a si. Phungki pa nih hin Chin nu ngakchia nute cu Phungki sianginn ah a hruai riangmang i a duh lo bui, hramhram in a sualpi chih hi a si. Phungki pa a cawlcangh ning le ngakchia nute a sualpi ning cu chungkhar lei nih an theih hnu ah an fanute zong cu bia halnak tha tein an tuah.
Phungki pa nih hin Phungki sianginn ah a ka hruai i ka duh lo buin voi (2) a ka sualpi tiah ngakchia nute nih cun a nulepa sin ah a chim ve. Cu hnu ah chungkhar lei nih Phungki pa cu Police sinah an report tiah theih a si.
Hi kong a buaipitu minung pakhat nih “Police sin ka va phak ahcun Police pawl nih felfai biahalnak zong kan tuah dih cang i a dang dantatnak kong he pehtlaih in tawlrel ding zong kan tuah dih cang tiah an ka chimh. Cu lawng si loin report kan tuah zaan suimilam 11 pm ah Police nih Phungki pa zong cu an tlaih colh ve cang i Lockup ah an chiah.”
“Police sin kan phak cang tikah tuah ding a tampi. Ngakchia nute a kum zong an zoh fel than lai. Cun tlaihhrem taktak a si maw timi zong Sibawi lei nih an zohfel ve rih lai. Siibawi lei nih cun ngakchia nute a chiatha an zoh cang i result kan hngak ko” tiah a chim.
“Ahmasa ahcun Phungki pa a chungkhat lei nih ting 10 in an rak nawl len cang hna nain ngakchia nute chungkhar lei nih an duh lo. Cun ting 30 in an rak i ken than i chungkhar lei nih an cohlang duh rih hna lo. Cu hnuah report nak zong kan tuah lawlaw hi a si” tiah hi kong a buaipitu pa nih a chim chih.
Phungki pa cu pohmah 376 in tazacuainak an tuah cang. Atu hi Police kut ah amah cu an um rih ko. Siibawi lei result a chuak bak in a dang cawlcanghnak pehzulh than a si lai tiah Chin World News Evening tarlangh ning in thei a si.
Hmanthlak pawl hi google in aa tlak deuhmi lak chinmi an si.
Leave a Reply