Chinshwehaw Hpawngseik Ngunkhuai Zung Sakhan Cu MNDAA Nih An Laak, SAC Ralkap Lei A Thimi An Tam, Shan ramkulh chaklei, Chinshwehaw Hpaungseik ngunkhuai zung sakhan cu PDF nih nihin October zinglei suimilam 4:00 ah MNDAA nih an kah i SAC ralkap lei tam ngai an thi, ngunkhuai zung le sakhan zong an khangh, tiah theih a si. “Shan ramkulh chaklei, Chinshwehaw khuapi pawng um SAC ngunkhuai zung cu a ciam dih, Chinshwehaw Hpawngseik sakhan zong an laak cang. SAC ralkap le palik a thimi an tam.
Chinshwehaw khuami hna cu Wa ramkulh lei ah an zaam,” tiah tualchung mi hna nih Khit Thit Media ah an chim. SAC ralkap le palik a thimi an tam caah Lashio in Chinshwehaw khua lei ah Tank le motor in SAC ralkap nih bawmtu an thlah hna, tiah theih a si. Cu ṭhiamṭhiam in Shan ramkulh chaklei, special region 1 le Laukkaing peng um SAC ralkap pawl cu a hram in bongh ding ah kan doh cang hna lai tiin MNDAA nih thawng an thanh.
Shan ramkulh chaklei special region 1 chung ah a ummi SAC ralkap cu a hram in bongh ding, Laukkaing peng ah online in mi a hlengtu hna zong fimhlawm ding, online in mi a hlengmi Company pawl a bawmtu ralkap kham ding ah Lashio-Chinshewhaw, Lashio-Muse pyidaungsu lampi cu nihin October 27 zing suimilam 6:00 in kan kham cang. Mi zeipoh kan khammi lam cung in nan kal ahcun kan in kah hna lai , tiah phungning tein an thanh.
October 26 in 27 zinglei tiang kahdohnak ah MNDAA nih SAC ralkap an tlaihmi an um leng ah hriamnam le zen-kuan tam ngai an laak, tiah theih a si. Thawng dang relchap- Global Zotung Supreme Council Nih CDF-Zotung Cu Ralrin An Pek Hna, CDF-Zotung nih Zotung hmunram ah minung lungthin pu loin thil an tuahmi cu Global Zotung Supreme Council(GZSC) nih faak piin kan doh i kan cohlang hrimhrim lo, ralhrang phu pakhat an si.
Hi hnuah Zotung hmunram um tualchung cung ah kutthlak in thil an tuah le a phunphun in hrocernak an tuah ṭhan ahcun faak piin kan lehrulh hna lai, tiah an thanh. Global Zotung Supreme Council(GZSC) cu hramhram uknak a dongh tiang doh ding le Federal rampi ser khawh nakding ah CNF/CNA he i bawm in doh a thleng i rian a ṭuan cuahmahmi kan si pinah mizapi an him nakding ca ah GZSC cu dirhmi a si, tiah an langhter.
GZSC in a chuakmi CDF-Zotung nih Zotung hmunram ah chek gate an tuah i khualtlawng mi hna cu ngunkhuai an khawlh hna leng ah khuate zong ah ngunkhuai an khawlh hna. Sualnak ngei lo tualchung mi hna tlaihkhihnak, tukvelhnak le hriamnam in tlerhkhawnnak a phunphun an tuah, tiah an cathanh ah cun an langhter. GZSC nih an langhter ning ah CDF-Zotung an thil tuahmi lakah ngaih a chia khunmi cu lungrual tein a um komi tualchung mi karah rem lonak thil an tuah hi a si.
Anmah he lung aa khat lomi paoh cu an ṭhawl dawi hna. Nu hna zong hual loin an tuk an velh hna i an tlerhkhawn hna. Cu pinah Zotung hmunram Yansi khua B.E.H.S sianginn ṭhen ah ca a cawngmi siangngakchia Lung Ṭhung, Cung Lian Uk, Bawi Khan Lin le Romin Thang hna cu an tlaih hna i an tuk an velh hna. Tualchung mi cheukhat an tlaihmi hna zong atu tiang an thlah rih hna lo, tiah an langhter. CDF-Zotung nih siangngakchia pali an tuk an velh hna tiin GZSC nih cathanh an chuahmi ah an tuk an velh hnanak a ruang an langhtermi a um lo.
Leave a Reply