Arakan ramkulh, Yatheihtang myone, Setipyin khua pawng i ralkap, palik le lahwahkah pawl fonhmi minung lutchuak chektu Nah-Sah-Khah phu hna cu ramri minung lutchuah cheknak an tuah lio ah AA hriamtlai he an i kap caah ralkap, palik le lahwahkah cheukhat telh in minung 14 an thi pinah minung 6 cu AA nih an tlaih tiah theih a si.
Nah-sah-khah phu le AA kar kahdohnak cu tihni August 2 in ni 3 tiang nihnih chung pehzulh in a si i Yatheihtaung myone, Setipyin khua le Maungdaw myone Kyaukvanduh khua kar, tlang lam ah an i kap tiah theih a si.
“Lahwahkah hmu Kyaw Zaw Khaing, Palik bawi pakhat, ralkap bawi pakhat le ralkap cheukhat telh in minung 10 leng an thi tiah kan theih. AA nih ralkap 6 an tlaih hna. Raldohnak hi ralkap le palik fonh in minung thazaang 400 hrawng an si i AA lei in minung 300 le 600 kar hna nih lam kam kap hnih in an kulh i an kap. A thimi ruak hna cun Indin in Sittwe ah kalpi an si. Sittwe ah vui an si te lai tiah kan theih” tiah an i kapnak kong a theihtu pakhat nih Yangon Khit Thit Media ah a chim.
Thawngpang theih ning ahcun Nah-sah-khah tavuan aa thlenmi ralkap nih an va thlah lio ah AA nih an bawh i an kap, hmasa zongah AA nih hi hmun ah an kap bal cang tiah theih a si.
“Lahwahkah hmu Kyaw Zaw Khaing phu hi Yetheihtaung ah a um ciami an si. Apa hi pensen a lak hnuah a tu Palehwa ah um lio si. A nupi hi Kwetkhaing ah siangcachimh sayamah a tuan. Tu zong an ikap kho rih” tiah Lahwahkah hmu U Kyaw Zaw Khaing apa hawi pakhat nih Yangon Khit Thit Media ah a chim.
Hi kongah AA lei nih a chim ve mi cu Yetheihtaung myone, Chaklei Nan khua in nitlak lei Kilometer 3 hrawng a hlatnak ah Kawl cozah ralkal le palik fonh in AA he kan i kah. Ralkap cheukhat kan tlaih hna pinah an hriamnam tam nawn kan lak khawh tiah an phuan ve.
Ref: Khit Thit Media
Leave a Reply