AA Nih Paletwa Peng, Myeikwa Khua Um Ralhrial Hna Cu Bawmhnak An Pek Hna

Paletwa Peng, Myeikwa Khua Um Ralhrial Hna Cu AA Nih Facang Le Tangka Bawmhnak An Pek Hna, Chin ramkulh, Paletwa peng, Myeikwa khua um ralhrial hna cu facang le tangka bawmhnak kan pek hna, tiah Rakhine ralkap AA nih January 24 ah thawng an thanh. Myeikwa khuapi um ralhrial hna cu chungkhar pakhat ah Myanmar tangka in 206,500 le facang pawng 73 cio kan bawmh hna i chungkhar 121 cu bawmhnak kan pek khawh hna, tiah an langhter. Myeikwa khua ah 2022, August thla in India le Rakhine ram in ralhrial mi chungkhar 136 an um i.

A tu cu an khua cio ah an kir pah cang hna caah chungkhar 121 lawng an taang cang, tiah Rakhine ralkap AA nih thawng an thanh. Thawng dang relchap- Malaysia Ram Ah Tlaihkhih A Tong Mi Ramdang Mi 628 Lak Ah Chinmi 60 Leng An I Tel, Malaysia ram, Seremban khuapi ah Malaysia palik phu le Immigration phu nih Myanmar ram mi telh in Document a ngei lo mi ramdang mi 628 an tlaih hna i, cu chung ah Chinmi 60 leng an i tel ve, tiah theih a si.

January 23, zan suimilam 11:30 hrawng ah ramdang mi a tam-u an umnak Malaysia ram, Seremban ah palik phu le Immigration phu nih chekhlatnak an tuah i Myanmar ram mi 109, Bangladesh ram mi 210, Nepal ram mi 206, Indonesia ram mi 56, Pakistan ram mi 13, Sri Lanka ram mi 8 le India ram mi 13, an zate 628 an tlaih hna i tlaihkhih a tong mi Myanmar ram mi 109 lak ah Chinmi 60 leng an i tel ve.

Tlaihkhih a tong mi ramdang mi 628 cu Lenggeng Immigration Depot ah ṭuanvo ngeitu nih an chiah hna. Myanmar ram mi kum 35 nu pakhat cu zaam aa timhnak ah inn dot hnih cung in a zuang i a hliam a fak ngai, tiah theih a si. A luancia January 19 ni ah Malaysia ram Selangor pengkomh chung mizapi nih palik phu le Immigration phu sin ah tlaih ding in thawng an rak pek hna ruang ah Document a ngei lo mi Myanmar ram mi 561 cu ṭuanvo ngeitu nih an rak tlaih hna.

Leave a Comment

Leave a Reply

Your email address will not be published. Required fields are marked *