AA Nih SAC Ralkap Tilawng 7 An Hrawh I 3 Cu Ti Chung Ah An Pil

Rakhine ramkulh ah AA nih SAC ralkap tilawng 7 cu an kah hna i, 3 cu ti chung an pil, tiah chaklei hriamtlai ṭangṭi phu thum nih phungning tein an thanh. February 7 le 8 ah AA nih an kah mi SAC ralkap tilawng 3 cu ti chung ah an pil i, a dang tilawng 1 zong an hrawh, tiah theih a si. 2024 kum chung ah AA nih SAC ralkap tilawng 7 an hrawh cang i tilawng 3 cu ti chung ah pil lak in an kah. Tilawng chung um SAC ralkap pawl cu hriamnam chia dingin AA nih an auhhnawh hna nain an zaam caah, a zaam mi hna cu pakhat hmanh taang loin an thah dih hna, tiah theih a si.

Cu leng ah Rakhine ramkulh, Myo Oo khua um thil hlun a umnak le Rakhine mi nih an sunsak ngai mi hmun a hrawktu SAC kuttang palik battalion No. 31 zong AA nih an kah i an laak. AA nih Rathedaung peng, nitlak thlanglei, Angu Maw-Maungtaw motor lam kam um ramri hngak SAC ralkap sakhan zong nizan February 8 zinglei suimilam 7:00 hrawngah an kah, tiah theih a si. Thawng dang relchap- SAC Ralkap Nih Shahtaw Peng Ralzaam Nu 3 le Ngakchia 3 An Thah Hna.

Karenni ramkulh, Shahtaw peng chung ralzaam nu 3 le ngakchia 3 cu SAC ralkap nih a luancia February 4 ni ah an hrem hna hnu ah an thah hna, tiah Karenni Human Rights Group nih nizan February 7 ah an thanh. SAC ralkap kut in a thi mi nu 3 lak ah pakhat cu naupawi lio mi a si i a dang pahnih cu pum tlamtling lo an si. Nu paw chung i a um mi naute relh chih in thah a tong mi 7 an si, tiah Karenni Human Rights Group nih an langhter.

Thah a tong mi nu 3 hna cu kum 30-50 kar an si i an taksa dang ah hliamhma a um pin ah an lu ah meithal hliamhma hmuh an si i, kum tling lo ngakchia 3 chung ah pahnih cu an lu ah meithal hliamhma hmuh an si, a dang pakhat cu a ṭaang ah meithal hliamhma hmuh a si, tiah Karenni Human Rights Group nih an langhter. A bu i tualchung mi thah an tonnak kong ah Khah-Lah-Yah 249 Battalion Commander nawlpeknak in a kuttang SAC ralkap nih an thah hna, thah a tong mi hna cu Shahtaw peng chung ah a um mi chungkhar khat an si, tiah tualchung Media hna nih an langhter ve.

Leave a Comment

Leave a Reply

Your email address will not be published. Required fields are marked *