AA Nih SAC Sakhan 2 Pin Ah Hriamnam Lak Mi Tam

Arakan Army (AA) Nih Mrauk-U Khuapi Hrambunh SAC Ralkap Sakhan Pahnih An Laak, Rakhine ramkulh, Mrauk-U khuapi hrambunh SAC ralkap Khah-Mah-Yah 377 sakhan le Khah-Mah-Yah 378 sakhan cu Rakhine ralkap AA nih an laak i hriamnam tam ngai an laaknak kong nihin February 12 ah an thanh. Mrauk-U khuapi hrambunh SAC ralkap sakhan kahdohnak ah SAC ralbawi pawl nih an hman mi Pistol telh in RPG le hriamngan dang tam ngai an laak mi cu AA nih an langhter.

AA nih Rakhine hmunram chung Mrauk-U khuapi chung SAC ralkap Battalion sakhan hna cu a luancia February 7 in laak hram an rak thawk. Cu pin ah Minbya, Kyauktaw SAC ralkap sakhan vialte zong AA nih an laak dih. Arakan Army nih Rakhine hmunram chung kahdohnak ah Honwitzer le seh meithal telh in hriamngan dang le hriamnam a thong leng in an laak cang i SAC ralkap Helicopter pakhat zong an thlak khawh. Cu pin ah SAC ralkap tilawng 7 zong an hrawh khawh cang.

1027 Operation thla thum leng ah Rakhine ralkap AA nih Chinram chung Paletwa, Rakhine ramkulh chung ah Minbya, Kyauktaw, Mrauk-U le Pauktaw khuapi hna cu a ningpi in an uk khawh cang i, khuapi dang um SAC ralkap sakhan zong tam ngai an laak cang. Thawng dang relchap- Malaysia Ram Ah Myanmar Ram Mi Telh In Ramdang Mi 263 Tlaih An Si, Chin Mi 30 Hrawng An I Tel, Malaysia ram, Kuala Lumpur khuapi ah Myanmar ram mi telh in phungning loin a um mi ramdang mi 263 tlaih an tong, tiah Myanmar mi bawmchantu phu(Malaysia) sin in theih a si.

Kuala lumpur khuapi, Pudu bazar pawng Singapore Hotel le tualchung mi inn ah February 8 zan suimilam 7:00 hrawngah Malaysia palik le Immigration hna i bawm in chekhlatnak an tuah i minung 263 an tlaih hna. Tlaih a tong mi minung 263 chung ah Myanmar ram mi 50 hrawng an i tel i zeitindah an tuah te hna lai ti cu hngalh a si rih lo, tiah Myanmar ram mi bawmchantu phu in ṭuanvo ngeitu pakhat nih a chim.

Palik le Immigration nih an tlaih mi 263 chung ah pa 229 le nu 34 an si. Myanmar ram mi 50 chung ah Chin mi 30 hrawng an i tel tiin Malaysia um mi Chin mi pakhat sin in theih a si. Malaysia palik nih an chim ning ah Myanmar ram mi pawl cu lam kam ah kuva hang chak, rithaisii hman, hla thang piin chuah le au khuan an hman tuk caah pawngkam Malaysia ram mi hna nih report an pek hna i, tlaihkhih an tonnak hi a si, tiah Khumi hartong phu in Chairman nih a chim.

Leave a Comment

Leave a Reply

Your email address will not be published. Required fields are marked *