Ahodah Hluttaw Speaker A Si Kho

By: Salai KB Thawng -Ka tlangtar hi biahalnak in ka thok bantuk in biachattu ka si lo. “Ruahdamh” sawhsawh a si i prophet zong ka si lo. Ramkheel thlihran ka bih khawh mual in ka hun thai mi a si. Cucaah, a dik lo sual tik ah ka tial mi aa palh tik ah, “Naa palh,” ti khawh a si lai lo.

Ahodah Hluttaw Speaker a si kho? Atulio Hluttaw Speaker a tuan lio mi Pu Zo Bawi cu thimnak ah aa cuh ti lo i midang pakhatkhat nih an tlaih cang lai, ti cu a fiang. Cucaah, kei ka zumh ning ahcun atulio Chin Ramkulh Cozah Upadi lutlai (Advocate General) Pu Sonny Thang Cung hi ka zumh bik. Amah belte, atulio Chief Minister Salai Lian Luai tu hna hi Chief Minister pakhat dirhmun in Minister le Hluttaw sawhsawh cu an pe lo kho men ve.

Aruang cu Hluttaw Speaker cu Law (upadi) a thiam mi a si a hauh ca ah Salai Lian Luai zong cu law (upadi) lei minung a si ve. U Sonny Thang Cung zong cu thiamthiam a si. Chief Minister in direct pi in Hluttaw Palai le Minister sawhsawh ah rian pek hi an i harh kho men. Asinain, tlak ti ahcun Pu Sonny Thang Cung aa tlak bik mi a si.

Amah belte, biahleichap ka duh. Ahoho kan chuah le kan tlin zong ah, “Kei cu mizapi nih mee peknak thawng in hi dirhmun ah ka dir,” ti hi philh hna hlah usih! Kanmah ca nakin mizapi ca ah rian a tuan ding mi kan si ti hi kan philhlo a herh. Hluttaw Palai si, Minister si, Hluttaw Speaker le Chief Minister si bu in kan i rumnak sual ahcun cucu kan lih le hrokhrawl in rian kan tuan tinak a si lai. Zeicahtiah, kan thlahlawh (lahkhah) men in rum, ti mi cu a si kho lo tuk mi a si.

Ka bia ka fun lai. Cozah thar cu Hluttaw hi February ah fehter a si lai i Cozah thar zong March thla chung thiamthiam ah an kai ve lai. Tutan Cozah thar Chief Minister ding ah ka zumh bik mi cu Pu Soe Htet le Hluttaw Speaker le Deputy Speaker ah Pu Sonny Thang Cung le Salai Lian Luai ka zumh bik hna. Biatang kaa danh bantuk in hihi a dik hrimhrim lai, a si hrimhrim lai, tinak a si lo.crd- the hakha times

Leave a Comment

Leave a Reply

Your email address will not be published. Required fields are marked *