AA pawl cu ALP phu nih kan members minung 5 nan tlaih tiah an mawhchiat hna. ALP lei in chimhnak nawlngeitu Colonel Khine Saw Mya nih Ponnagyun myone, Myaung Gyi khua pawngah kan hnu cawn nikhatni ah kan minung minung 5 an tlaih tiah nizan August 12 ni ah a chim.
An tlaihmi hna cu ALP joint secretary Khine Aung Soe Than, Liaison officer Khine Htay le Rakhine community health workers Khine Myo Zan, Khine Moe Zat le Khine Hein Zaw hna an si tiah Colonel Khine Saw May nih a chim chih.
Col. Khine Saw Mya nih a chim rih mi cu, “AA nih zeiruangah kanmah an kan hmuitinh timi ka thei lo. Kanmah nih cun palai thlah in an tlaihmi minung 5 luatnak ding ah kan i zuam cuahmah lio” tiah a chim chih.
AA nih ALP minung 5 an tlaihmi kongah AA lei nih zeihmanh lehnak an tuah lo pinah cozah lei nih zeihmanh fehternak an tuahmi a um rih lo tiah MM Times nih a tarlangh.
AA le cozah ralkap kar kahdohnak ruangah 2018, November thla thawk in Chin ramkulh le Rakhine ramkulh chungah ralzam thong tampi an um cang. March 23 ni ah cozah nih AA cu ralhrang a si tiah thawngthanhnak a tuah i mipi caah security a lami pawl a thah hna pinah mipi sawhsawh le cozah riantuantu pawl a tlaih hna tiah sual a phawt.
AA cu tutan Nay Pyi Taw i August 19-20 tiang tuah dingmi Union Peace Conference-21st Century Panglong ah cozah nih a sawm chih duh lomi hriamtlai phukhat a si. Cozah nih hin tlangcung hriamtlai phu pawl cu a luancia 2015 kum in kum 70 chung an rak doh cangmi daihter ding ah a sawm dih cang hna. Nain a cohlanmi le cohlan lomi hriamtlai an um rih thiamthiam.
Ref: MM Times
Leave a Reply