ASEAN hruaitu pahnih cu Jung 3, cawn nili ni ah Naypyidaw an phan cang tiah theih a si. June 4, thaizing cawn ninga ni ah ralhrang khawngsil hotu Min Aung Hlaing he tonnak an ngei lai tiah ralhrang cozah bawi pakhat nih a chimmi cherhchan in AFP nih a tial.
ASEAN hruaitu pahnih cu atu lioah ASEAN Chairman a simi Brunei ram , ramleng vuanci changtu Erywan Pewhin Yusof le ASEAN Secretary General Lim Jock Hoi an si. Ralhrang khawngsil nih a rauh hlanah thawngpang tling in kan thanh lai tiah an chim.
ASEAN hruaitu pahnih hi NUG tuanvo ngeitu hna he an i ton ding le ton lo ding a fiang rih lo. NUG cu Min Aung Hlaing nih ralhrangbu tiah a thanh i phungning lo bu ah chiah a si cang. NUG he pehtlaihnak a ngeimi hna zong tlaih dingin thanh a si cang.
Khatlei ah CRPH le NUG nih Myanmar ralkap cu ralhrangbu tiah min an bunh ve hna. Indonesia i Myanmar buainak kong meeting an tuah hnu thlakhat ah atu bantukin ASEAN hruaitu Naypyidaw ah an rat hi a si. Crd- the chin post
Thawngpang dang rel chap: CDM Palek An Umnak Inn Mawtaw Ngan Nih A Pah, Bawhte Pakhat Telh In Minung 8 Hliam An Tong, Mizoram ramkulh, Phuncawng khua ah Myanmar CDM palek chungkhar an umnak inn pahnih cu June 3, zanlei 6:00 pm hrawngah khan mawtaw ngan (kungka) nih a pah i a cim dih tiah theih a si.
Hi inn pahnih ahhin chungkhar pali an um i cu chungah chungkhar pahnih cu Myanmar CDM palek an si. Inn cimh ruangah mining 8 hliam an tuar. Aizawl siizung ah an tlikpi colh hna. Pasarih cu siizung um an hau lo, pakhat tu cu a fah ngai caah siizung an thlop cuahmah. Phuncawng khua hi Aizawl in meng 9 hrawng a hlatnak ah a ummi a si. Inn a pahtu mawtaw zong cu hawrkuang ah a tla.
Siizung ah an thlopmi cu CDM palik chungkhar an si. CDM palik hna an fa bawhte zong a lu a kuai. Inn pah a tongmi hna cu Phuncawn khua i sianginn ah hmunhma an serpiak chung hna tiah bawmhchanhnak ah aa telmi Lai Christian Fellowship hruaitu pakhat nih a chim. Crd- the chin post.
Leave a Reply