Yangon khuapi um inn No. 54 Aung San Suu Kyi ngeih mi inn le vawlei cu cultural heritage ah NUG nih 2022 kum ah an rak ser i cu inn zuar, hrawh le cawk khawh lo dingin nizan September 29 ah an thanh. Aung San Suu Kyi inn hrawh a timtu hna hi fiang te le fek tein kan hngalh hna. Inn No. 54, Aung San Suu Kyi inn hi SAC nih phaisa tam bik a pe khotu sinah zuar an timh tiin thawngpang a len ruangah NUG nih thanhnak an tuah hi a si. Cu ruangah Yangon um inn No. 54 hrawh dingin thazaang a chuahmi,
Tawnghtham aa tim mi organization le pumpak an si zong ah upadi ningin dantat an si lai, tiah NUG nih an thanh. Inn No. 54 cu General Aung San a rak umnak inn a si i General Aung San fanu- Suu Kyi le a fapa Aung San Oo nih caan saupi chung ro ah an i cuh mi a si.crd- The Chin Post. Thawng dang: Mizoram Um Myanmar Ralzaam Hna Pumpak Sinak Cazin Laak An Ngol Cang Lai, Mizoram ramkulh chung ah aa dormi Myanmar ralzaam hna cu an pumpak konglam hlathlainak.
Siapi neh le mitmu hmanthlak hna la ti lo ding in Mizoram cozah nih bia an khiah cang. Kan unau hna an konglam le an sining kan hlathlai in cazin kan la ti hna lai lo. Mizoram ramkulh cozah nih kan ngol cang lai,” tiah Minister of Information and Public Relations Pu Lalruatkima nih a chim. Myanmar le Bangladesh um kan unau hna hi an konglam hlat in cazin kan laak mi hi an umnak ram kuat ṭhan dingah a voikhatnak karhlan bantuk a si. An ram a daih rih lo bu ah kan ram in kan ṭhawl hna a si ahcun nuhrin covo kan buar a si lai,” tiah,
Home Secretary H. Lalengmawia nih a chim. Mizoram le Manipur ramkulh ah Myanmar ralzaam hna cu an konglam hlathlai ding in cenral cozah nih April thla ah nawl a rak chuah nain September 30 ahcun ramkulh cozah nih a ngol cang lai. Central cozah nih cun phungning loin India ramchung ah a lut mi hna cu an konglam hlathlainak tuah dih ding in nawl a rak chuah nain Chief Minister Zoramthanga hruai mi. Mizoram cozah nih cun hi bantuk tuah hi ulenau karlak ah thleidannak a ummi bantuk a si tiah ngol rih ding in biakhiahnak an tuah.
November thla ah ramkulh Hlutdaw(MLA) thimnak zong tuah ding a si cang caah Mizoram ramkulh chung ummi zung vialte zong kan i manh lo. Ralzaam hna pumpak konglam le min cazin laak ding zong kan thazaang nih a daih lo, tiah Pu Lalruatkima nih cun a chim. Myanmar le Bangladesh ram um hartong mi hna pinah Manipur ramkulh Meitei le Kuki-Chin buainak ruangah minung 12,000 tluk zong Mizoram ah an i dor lio a si.
Leave a Reply