Aung San Suu Kyi Thong Tlak Kongah

Aung San Suu Kyi Nunnak Ah Harnak An Pek Ahcun SAC Nih Ṭuanvo An Laak Lai NLD, NLD Chairman Aung San Suu Kyi cu harnak an pek i thihloh tiang a ton sual ahcun SAC nih ṭuanvo an laak lai, tiah NLD Central Committee nih nihin September 14 ah an thanh. Hramhram in SAC nih an tlaihmi Aung San Suu Kyi cu a luat khawh nakding ah UN, Europe ram hna, Tuluk le ASEAN chungtel hna nih SAC cu pumpak zong in an ton pinah a lam phunphun in an tawlrel ko nain.

SAC nih cun an nawlngeihnak saupi a hmunh khawh nakding ah Suu Kyi cu an chuah duh lo, tiah NLD nih cun an langhter. Suu Kyi cu SAC nih zapi nih hngalh lonak hmun ah an chiah i ramkhel thongtla pakhat a sinak in a hmuh ding a simi thil zong an pek lo leng ah a ngandamnak zong ṭha tein in an zoh lo i ngandamnak he aa tlakmi tirawl zong an pe lo. Kum 78 a simi Aung San San Suu Kyi nunnak cu SAC nih ṭha tein an zohkhenh lo ruangah pakhat khat thih loh a tonsual a si ahcun nawlngeihnak latu SAC nih ṭuanvo an laak dih lai, tiah an thanh.

Cu pinah NLD nih Suu Kyi le ramkhel thongtla dihlak cu a rannak in an chuah khawh nakhnga ah UN, ASEAN le a pawngkam ram hruaitu, ramkip Community le ramchung ramleng dohthlennak phu hna izuamnak cung zong ah upatnak kan in pek hna, tiah NLD Nih cun an langhter, crd- The Chin Post. Thawng dang relchap- Ayeyarwaddy Ramṭhen, Hinthada Peng Ah Minung 1,000 Leng Nih Tilian Ruangah Umnak Hmun An Chuahtak, Ayeyarwaddy ramṭhen, Hinthada peng ah Ayeyarwaddy tiva pi cu a lian i, Ngetpyiotaw, Hpawngseik.

Ungtaw le Tawngok khua inn 200 hrawng ti nih a phum ruangah minung 1,000 leng nih an umnak hmun an chuahtak, tiah mi bawmchantu phu hna nih RFA ah an chim. Inn tampi cu mitung can in ti nih a phum hna i, cheukhat inn cu a zapi in a phummi zong an um. Phungki biakinn zong ti nih a phanh lonak ah an ṭhial, tiah bawmchantu pakhat nih cun a chim.

Tilian ruangah aa ṭhialmi hna cu caankarlak chung umnak thlam an i sak i cuka ah cun an i dor chung hna. Thil phorh le tlunkalnak a har tuk caah dinti, facang le chiti ti bantuk eidin an har ngai, tiah an chim. Khua caan tuaktan thiammi hna nih September 12 i an langhter ning ah, Ayeyarwaddy tiva pi cu Hinthada khuapi in rikhiah mi cunglei inches 8 tiang a ṭhang, tiah an langhter.

Leave a Comment

Leave a Reply

Your email address will not be published. Required fields are marked *