Aye Mya Phyu Nih A Facebook In A Ngaihchiatnak A Langhter

Myanmar Idol Season 4 hlasak zuamnak in mipi nih an theih i thazaang an pemi Aye Mya Phyu nih nizan ah a ngaihchiatnak cu lungzur ngai in a facebook ah a langhter. Cucu a pu a thihnak kong thawngpang a si tiah Celegabar nih a tarlangh.

Aye Myo Phyu i a pu cu a cuap a thatlonak a sau ngai cang i nizan ah a nunnak a liam ti a si. Aye Mya Phyu nih a ngaihchiatnak a langhtermi cu a hawile minthang hlasak thiam hna le a fan pawl nih thazaang peknak an langhter cio ve i a pu zong Kawl zumhnak bang in hmuntha ah phan seh tiah thlaza an campiak cio hna.

Cu pinah Aye Mya Phyu cu a pu thih ruang i ngaihchiatnak lawng siloin tu kar cu lungrawknak le thinlung buaibainak lawngte pehzulh in a tong caah a facebook account a khar chunnak kong cu a My Day ah a tarlanghmi hmuh a si. Celegabar nih a tarlangh.

A thinlung buainak kong he pehtlaih in Kawl ram minthang pawl an thlithup a kong a pholangh tawntu Han Nyein Oo zong nih nai ahkhan Aye Mya Phyu nih tlangval a ngeihnak kong le atu ahcun hawikom bantukin an um cang nak kong pawl cu an hmanthlak tete he a pholangh ve. Cu kong cu Aye Mya Phyu caah lungrawktertu thawngpang pakhat bantuk a si ve.

Aye Mya Phyu cu a min he i tlak in a thinlung thiang bantukin dai tein a ummi midai a si. Nain tu kar cu a thinlung buaitertu tete a um pah pinah a pu nih a thih tak fawn tikah a ngaihchiat a zual khun i tu bantukin a ngaihchiatnak a langhter hi a si. Aye Mya Phyu fan pawl caah ngaihchiat a tonnak kan van tarpiak hna.

Ref. Celegabar

Leave a Comment

Leave a Reply

Your email address will not be published. Required fields are marked *