Prophet Mohammad siaserhnak Facebook post kong he pehtlaih in tlanglei India ram, Bangluru khuapi ah police le sandahpiahtu mipi kar buainak a chuak i sandahpiahtu minung 3 an thi cang tiah police lei nih a chim.
TOI nih cun minung 3 an thi i sandah piahtu minung 110 an tlaih cang hna tiah a tarlangh. Nizan August 11 ni ah minung thong tampi nih sandah an piah tiah tiah Local News Agency nih a phuan.
Mibu phukhat cu police station pawngah an i pumh i police phu he an buai ti si. Cu ti cun sandahpiahtu hna nih police motor tam nawn cu mei in an khangh piak hna pinah police station kulh chungah hramhram in an lut ti si.
Cun a dang mibu phukhat cu ramkhel lei hruaitu pakhat inn hmai ah an i pumh ve i tling le lung cheh, lam kam ah a dirmi motor an hmuhmi paoh meikhangh ti bantuk an tuah hna ti si.
News nih an tarlangh ning ah sandahpiahtu hna nih meithatnak motor pawl zong an kham i mei thah kho lo ding in an tuah pinah thawnglatu hna zong an doh tiah an langhter.
Cucaah sandah an piahnak hmun hrawnghrang cu zan leng chuak lo ding in nawl an chuak tiah police pawl chimhmi cu thanghca pawl nih an tarlangh chin. DVB nih a tarlangh.
India ram ahhin Muslim le Hindu kar ah lockdown hlan piin buainak a chuak cang. Lockdown lio cu an dai cang hnga maw kan ti lio ah tu bantukin buainak a chuak than hi a si.
Ref: DVB, TOI
Leave a Reply