Khuathar i Carson Biakinn SAC ralhrang nih an Kulh, Nihin chun sml. 1:30 hrawng ah SAC ralhrang nih Khuathar ah a ummi Carson Baptist Church an kulh i atu ca kan ttial tiang ah an kir rih lo, tiah khuami pakhat nih a chim. Lam pawng dawr hmai ah ralkap motor pakhat a dir.
Carson biakinn an kulh. An kir rih lo, an um peng ko. Biakinn cung zong ah an kai,” tiah a chim. Mi an tlaihmi hna zong an um tiah khuami nih an chim nain fehternak kan tuah kho rih lo.crd- The Chin Journal.
Thawng dang : Thaizing September 14 UN meeting ah NUG Palai maw an thim lai, SAC Palai dah, asiloah thim loin an lanhtak lai dah?, September 14 ah a voi 75nak United Nations tonpumhnakpi cu an tuah lai. Hi tonpumhnak ah NUG nih an thim mi minung nih maw Palai sinak a hmuh lai, SAC nih an thim mi minung nih dah UN Palai sinak a hmuh lai,
A siloah thim veve loin dah an lanhtak lai, ti mi kong ah George Washington University i International Relation Department ah Professor a si mi Christina Finks bia a tanglei ah kan hun langhter than. “NUG ai-awhtu nih UN Palai hmunhma hmuh khawh ding ruahchannak cu a um. Cun, UN ah Myanmar Palai hmunhma hi ahohmanh pe loin lanhtak khawh zong a si thiam ve.
Ramchung ah a um lo mi cozah hna kha UN ah hmunhma an rak pek mi hna tuanbia ah a um bal ko. A luancia 1990 kum ah Haiti (Country in the Caribbean) le Sierra Leone (Country in West Africa) ram ah hi bantuk in ramleng phan cozah pawl UN ah hmunhma an rak pek bal hna. Cun Palai a thimtu committee nih Palai thimnak kong ah biakhiahnak tuah thai loin an rak lantak mi zong a um. Cambodia le Afghanistan ram hna zong an rak lanhtak bal,” tiah Christina Finks nih a chim.
UN Palai thim ningcang kong ah, “Palai thim ding a zohfeltu Credential Committee an um i an mah nih biakhiahnak an tuah. Cun hi committee nih bia a khiah mi kha cohlan ding le hnon ding kong cu UN General Assembly ah biakhiahnak tuah than a si. Cucaah Palai thimnak ah hin dot hnih in a um tiah chim khawh a si,” tiah a chimchap.
Hi UN Palai thimnak kong he pehtlai in International Law ah fianghlang tein langhter mi a um maw, ti mi kong ah, “Fianghlang tein tial mi cu a um lo. Asinain atak ah an hman mi cu a um. Cozah pakhat nih ram kha a uk khawh asiloah khua pakhat kha ahmun ah um in a uk khawh ahcun Credential Committee le UN Assembly zong ah UN Palai ah cohlan a si tawn. Hihi ca ah an tial lo nain tahfung pakhat a si.
Aruang cu ramkip cozah hna nih vawlei cung ram vialte remdaihnak um seh ti an duh caah a si. Asinain, ram le khua an uk khawh zong ah uknak hramhram in a lak hnu ah cozah a si mi cu UN nih an rak cohlan lo mi tuanbia ah a um ve,” tiah a chim. September 14 UN tonpumhnak ah Myanmar ai-awhtu thimnak hi phun thum in aphi a chuak kho.
NUG thim mi kha an cohlan khawh, asiloah SAC thim mi kha an cohlan khawh, cun ahohmanh kha thim loin lanhtak khawh zong a si thiam. A si kho bik mi cu ahohmanh thim loin lanhtak khawh a si, tiah Christina Finks nih a hmuhning a chim.crd-the hakha times.
Leave a Reply