Chin Ramkulh Ngandamnak Riantuantu Pawl Zung Kai Ding in Hnek an Si: Thaizing thawk in zung kai ding in Hakha khuachung in ngandamnak lei rianttuantu pawl an upale nih an hnek hna, tiah thawng kan theih. Chin ramkulh ngandamnak zung zong nih Feb. 15 thawk in zung a kaimi cazin lak ding in nawlpeknak ca an chuah (A tang screenshot).
Matupi ah cun “Kan kai lai lo” tiah CDM a tuahmi ngandamnak lei rianttuantu pawl nih biachahnak an ngei. Hakha ngandamnak lei rianttuantu CDM a tuahmi hna zong biaruahnak an ngeih hnu ah kai le kai lo biachahnak an tuah ve lai. Crd- The Chin Journal.
Cadang relchap: Laitlang Lei A Ummi Hna Atu i Kawl ralkap cozah nih nawlngeihnak an lak dih kongah duh lonak nan langh tikah nan him lai lo, mi cheu khat nih cun May Thet Thet Khine bang poipang a tongmi zong nan um te kho men. (Um lo dingin kan thlacamnak a si). Min Aung Hlain biachim zoh tikah zeitluk rampi nih duhlonak zarh khat leng an langhter cang nain a si khawh chung in zapi lungton ai zuammi hmuh khawh a si.
Uknak pek ṭhan ding le hruaitu thlah ding cu a thluak ah ai tel lo hrim hrim ti hmuh khawh a si. Ni tlawmpal cun an zuam cawk lai lo i zapi hi ka uk khawh te ko lai tiah ruat seh law theih lo a si ko. Cucaah cun, nan dirhmun hi a har dingmi a si. Nunnak pek tiang tiang in ram caah ai pe ngammi hi kan tlawm tuk, zeica tiah kan nunnak sungh hi kan siang ciomi a si lo. Nain Kawl cozah uknak cu nan tuar cia le nan theih cia a si ko i kan nun zongah anmah kut tang kan um ahcun nung nana thih khi a si ko.
Cucaah cun fawi tein ngah lo dingmi thil dirhmun ah nan phak tikah kan lung a ṭha lo. Ram kip in kan in dirpi hna. Kan in ṭahpi hna. Ralkap sining a thei dihtu kan si. Nan lung belte dong hram hlah uh, ahohmanh i pheo lo le i hrial lo tein hmun khat ah ṭang ṭi hram ko u law, zei kan ti hnga kan duh lo bikmi cu heih kan ton fam cu.
A fawi lai lo, a fawi hrim hrim lai lo. Thisen zong a va luan sual te hmanhah, Bawipa nih an zoh sawh hna lai lo. Kawl ralkap uknak kuttang um cu nung nana thih he aa lo ko timi ruahnak te he ralring bu tein nan lung kan dongh piak hrim hlah u law, ramdang ah thlahmi nan hawi Laimi hna hi Bawipa nih a sawh sawh in an kan thlah lo timi ruahnak te he hmai nor hram u mu.
Miphun caah nunnak pek a herh caan zong a va si te sual cun, Bawipa nih keimah, nangmah hna a kan thim a si cun, zeizong te hi Bawipa nih a khan dih te ko lai. Bawipa kan lei a ṭan ahcun ahonih dah a kan tei khawh lai. Nusung Hrangtlung- Nunu.
Leave a Reply