Naypidaw Ralhrang Vanzam Sakhan an kap ih a kang. Ralhrang thizat le hriamhma ngahzat an fiah thei hrih lo thawng peh-SAC ralkap nih biapi ngaiin an chiah i an hmanmi vanlawng umnak sakhan Naypyidaw Air Base cu April 16, zan suimilam 11:00 hrawng ah an kah caah, mei-alh nganpi a chuah hnu ah a kang tiah Naypyidaw hrambunh media hna nih an langhter. Naypyidaw Air Base ah nizan suimilam 11:00 hrawng ah puahkehnak voi hnih a than hnu ah meikanghnak a chuak, a kanghning zong a fak ngai.
A thimi le aa hliammi zong an um tiin kan theih, thil sining dikthlir cu fiang tein kan thei rih lo” tiah Naypyidaw hrambunh media nih an langhter. Naypyidaw Air Base a kaptu hi mizei phu an si theih a si rih lo. Hi kahnak ruang ah hin meikanghnak a chuak i, cu meikang zong cu caan sau ngai a rauh hnu ceo ah an hmih khawh tiah theih a si.crd- The Chin Post. Mah a link hi htalau/videos/95478 hmeh law a video na zoh khawh lai.
Thawng dang relchap- UN Security Council Cu NUG Foreign Minister Nih Fak Ngaiin A Soisel, Kanbalu peng Pazigyi khua ah SAC ralkap Jet Fighter le Mi35 nih kahdohnak an tuah ruang ah a nunnak a liami hna cung ah UN Security Council nih, zeihmanh mawhchiatnak an chim lo ruang ah NUG Foreign Minister Daw Zin Mar Aung nih fak ngaiin UN Security Council cu a soisel, tiah theih a si.
UN Security Council ah VETO nawlngeihnak a ngeimi ram hna nih, Kanbalu peng Pazigyi khua ah SAC ralkap nih thahnawnnak an tuah i tualchung mi a za leng an thihmi hi ramchung buainak sawhsawh a si, tiah nan ruah ding a si lo. Mithmuh kuttongh in SAC ralkap nih thahnawnnak an tuahmi a si ko. Thuh awk le pheh awk a ṭha lomi a si. Hi kong ah UN Security Council nih mawhchiatnak nan tuah lomi cu ningzak ngai a si.
A hlei in VETO nawlngeihnak a ngeimi ram hna nih ṭuanvo nan ngei,” tiah NUG Foreign Minister Daw Zin Mar Aung nih cun a chim. April 11, ah Pazigyi khua ah ralkap nih tualchung mi thahnawnnak a chuah hnu ni khat ah UN Security Council cu innka khar khumh in meeting an tuah ko nain VETO nawlngeihnak a ngeimi Russia le Tuluk nih SAC ralkap lei an ṭan caah an meeting tuahmi cu santlaihnak a ngei lo. Cu ruang ah NUG Foreign Minister nih a soisel hnanak a si, tiah theih a si.
SAC ralkap duhlonak le cohlan lonak hi cathanh sawhsawh in chuah caan a si ti lo. A tak in ṭuan caan a cu cang. SAC ralkap kut in khamh cu chim lo, Myanmar rammi hna nih an herhmi eidin tirawl hmanh an kan bawm kho lo. Meeting ah mah le mah i alnak in caan an donghter ding a si ti lo. A tak in an ṭuan awk a si cang, tiah a chimchap. Pazigyi khua ah nunnak a liammi hna hi minung 186 an si i, cu chung ah kum tling lo 40 an i tel, tiah NUG nih an langhter.
Leave a Reply