Nihin Ah Kokang Pengkomh SAC Ralkap Sakhan 4 An Laak Chap, 1027 Operation Ni 8 Chung Ah SAC Ralkap Sakhan 97 An Laak Khawh Cang, Kokang hmunram chung a ummi SAC ralkap pawl cu pehzulh in kan kahdoh hna caah sakhan 4 kan laak chap, tiah MNDAA chimphuannak nawlngeitu Li Kyar Win nih a chim. Nihin November 3 ah Kokang pengkomh chung Toneshan le Xishan hmunram 2 ah SAC ralkap sakhan 4 kan laak chap, tiah Li Kyar Win nih cun a chim.
1207 Operation ah aa telmi Ta’ang ralkap TNLA zong nih nihin ah Mandon, Namkham le Moemeik peng ah SAC ralkap sakhan 4 an laak khawhnak kong cu thanhnak an tuah. Nihin November 3 kahdohnak ah MNDAA nih Chiaukpaciangh, Wanningkyun, Shiimeikhaing le Kyankyarlaykun sakhan hna an laak khawh. Cu pin ah nizan November 2 zan ah Theinni pengkomh Mayhan khua pawng SAC check gate cu Drone in an kah, tiah theih a si.
1027 Operation kahdohnak ah chaklei hriamtlai phu unau 3 nih SAC ralkap sakhan 97 an laak khawh cang, tiah theih a si. Thawng dang relchap- Myaing Peng Ah SAC Ralkap Motor Bomb Puahhnawhnak Ah Aa Hliammi An Tam Caah Khuachung Ah Lut In Tarnu Pakhat An Tlaih I An Khangh, Magway ramṭhen, Myaing peng ah SAC ralkap motor pawl cu bomb an puahhnawh hna i ralkap aa hliammi an tam caah Silaung khuachung ah lut in tarnu pakhat cu a nung in an khangh i inn zong an khangh hna tiah.
Myaing Pah-Kah-Phah in ṭuanvo ngei pakhat nih Yangon Khit Thit Media ah a chim. November 2, zan suimilam 10:00 hrawng ah Pakkoku in Myaing khua ah a rami SAC ralkap motor 4 cu Myaing peng Kyauksauk khua le Thannghetaw khua kar ah tualchung hriamtlai phu hna nih zan suimilam 12:40 hrawng ah bomb an puahhnawh hna i ralkap hliam pumi an tam, tiah theih a si.
Tualchung hriamtlai phu nih bomb an puahhnawh hna hnu ah aa hliammi an tam caah bomb puahnak pawng Silaung khua ah lut in kum 70 tarnu pakhat cu a nung in an khangh i inn 3 zong an khangh chih, tiah theih a si. Bomb puahhnawh in hliam a pumi SAC ralkap pawl cu Myaing Myoma siizung ah an kuat hna, Myaing khuachung ah SAC ralkap an luh cang caah khuami zong um kal i ralring ding in Myaing Pah-Kah-Phah nih ralrin an pek hna.
Leave a Reply