Many Pacquiao cu boxing thongh zoh huammi pawl nih nan theih dih cang bantukin UFC ah minthang fighter Conor McGregor zong UFC a zoh tawntu pawl nih nan theih cangmi a si. McGregor cu nai te ah UFC thonghnak in aa din cang nak kong cu a social media in a fan pawl theihternak a tuah hna.
Nain idin sawhsawh rih lo in tu bantukin boxing lei singkhawnak a cohlan than hi a si. Pacquiao le McGregor i singkhawnak puai cu Middle-east ah tuah a si te lai i a ra laimi 2021 kum ah tuah ding in phung ning tein thanhnak tuah a si cang tiah theih a si.
McGregor nih UFC in aa dinhnak kong a social media in thanhnak a tuahmi cu a fan pawl nih an cohlan kho ve lo ti si. Zeicatiah McGregor nih hin tutan he kum 4 chungaah kaa din cang lai tiah a thanh cang i voithum a si cang. Tutan dinhnak kong a thanhmi zong hi phung ning tein thanhmi a um rih lo nain mi tam deuh nih an ruah bantukin Pacquiao he i thongh than ding an si.
Philippian boxer minthang Pacquiao nih hi singkhaw puai ah a hmuhmi phaisa vialte cu Covid 19 ruang i harnak a tongmi hna bawmhnak caah ka hmang lai tiah a phuan ve cang.
“Keimah cu a ra laimi kum ah McGregor he kan i phomhnak in ka hmuhmi phaisa vialte cu Covid 19 ruang i harnak a tongmi caah ka hlut lai. Cu puai cu Middle-east chung ram pakhatkhat ah a si te lai. McGregor hi keimah caah zuamcawhtu tha pakhat a si. Ka fan pawl nan lungrawk lo ding in keimah lei in tampi kaa zuam lai” tiah Pacquiao nih a chim ti in Daily Mail nih a tarlangh hi a si.
Ref: SM
Leave a Reply