Breaking News: Ralhrang Nih Paletwa Ah Man Foi Tein Thil An  Zuar Lai

AA le SAC ralkap kar kahdohnak pehtlaiin a umnak le eidin a cahnak Chin ramkulh Paletwa ah SAC ralkap nih man fawi tein eidin thilri zuar an timh tiah Paletwa khuami nih an chim. Arti hi a leng ah pumkhat 1000ks in kan cawk tawn nain, SAC ralkap nih pum khat ah 100ks in kan zuar lai tiah an chim.

Cu thil zuarnak cu nihin September 16 in kan thawk lai tiah an chim nain tilawng a phak rih lo caah nihin cu an tuah kholo tiah theih a si. SAC ralkap nih a tu bantuk in thil man fawi tein zuar an timhnak cu SAC ralkap nih mipi zohkhenhtu kan si tiah chim in langhter an duh caah a si tiah tualchung mi hna nih cun an chim.

Tu bantuk in man fawi tein thil zuarnak cu sipin nih ṭuanvo lak in an tuah lai i, chungkhar cazin ning in chungkhar pakhat ah minung pakhat nih cawk a ngah lai tiah an chim. Paletwa lawngah siloin Chin ramkulh chung khuapi kip ah tuah an i zuam i a cheukhat hmunhma ahcun an tuah dih cang tiah theih a si.

Thawng dang peh-Mindat khua ah SAC he rian a ṭuanṭi mi Non-CDM cozah rianṭuantu pawl cu ramchung in an chuah hna lai, Chin ramkulh, Mindat peng chungah SAC he rian a ṭuanṭi mi cozah zung kip Non-CDM cozah rianṭuantu pawl cu Mindat mipi uknak phu nih an min an hnawh hna lai i ramchung in an chuah hna lai tiah theih a si.

An min hnawhmi pawl cu CDF-Mindat nih a tlaihnak hmunhma pawl ah umkalnak nawl an ngei lai lo i ramchung in chuah an si lai lengah biaceihnak zong an ing lai tiah theih a si. SAC he rian a ṭuanṭi mi zung kip kha ṭha tein kan zohfel lai i an min kan hnawh hna lai lengah adang mipi pawl bantuk in chawnhbiak an si lai lo tiah CDF-Mindat nih a thanh.

Leave a Reply

Your email address will not be published.