Thantlang Sianginn sang Thlanmual lampial zawn ah Tlangval no pakhat le Police pa le a nupi tiin cycle pahnak a cang. An mittlang a tlek veve i an hma zong a fak ngai. Tlangval no hi a cycle mei a um lo i Zu zong a ri ngaingai. Siizung ah thit ding kan ti hna nain an duh lo i Police pawl tu an aoh hna caah an hngah lio hna a si. Crd; CBN
Ca dang rel chap; By- Chelsea Bawi: Brandon Bernard caah zaangfah nawlnak an tuahmi US Suprme Court nih a hnonpiak hna hnu in, Indiana ah thihdaan an tatmi Brandon Bernard cu thihdaan an pek. Bernard hi kum 40 minung a si i, tleirawl a si lio 1999 i lai a nawn caah ai tlaihmi a si. Federal cozah nih kum 70 chungah a kumno bikmi thihdaan an pekmi a si.
A thih hlan te ah nuva tuah khat a thah hna kongah Bernard nih ai chirnak kong a chim ta, tiah theih a si. Trump a president sinak a dih hlan ah minung 4 thihdaan pek dingmi an taang rih, ti a si. Minung 5 ningin thihdaan pek an si taktak ko ah cun, kum 100 lenglo chungah US president vialte lakah thihdaan peknak a hmuh tambik a si lai, tinak a si. Thihdaan peknak an maakta rih hi kum 130 hrawng a si cang i, president rian i chawnnak tuah lio pi ah cu phung cu an vun pah chih. January 20 ah khin Joe Biden hi President a vun si cang lai.
Sual phawtpa i a donghnak hmurka, Thursday 21:27 ah khan Terre Haute khuapi ah a ummi thonginn chungah Bernard a thihnak cu namhneh a si. A thih hlan deuh ah a thahmi hna chungkhar sinah a hmahnungbik biachimnak a ngei ta i, dintein minung 3 chung hrawng bia a chim. “Ka lung a tha hrim lo. Cu vialte lawng cu ka chim khawh tawk a si. Hi bia nih hin ka thah lio hna caan i ka lung a that lo zia le nihin zong i ka lung a that lo zia a langhter ko” tiin a chim. Cu a biachimmi te cu Associated Press nih an vun thanhpiak chin. Supreme Court ah Bernard a sihni pawl nih nawlnak an tuah caah thihdaan peknak caan suimilaam 2 lenglo tiang an thawnpiak chung.
Bernard hi sei kongah dah sualphawt a si, June 1999 lio ah khan Todd le Stacie Bagley thah an tonmi kongah Bernard zong ai tel ve, tiin sual an phawh i thihdaan an khiahpiak mi pa a si. Amah le a dang tleirawl 4 hna nih nuva hna cu an inn an ramhpiak hna i, an nuva cun Texas i an mawtaw hnulei thilri chiahnak ah an hranhram in an khumh hna. An ihter hna khawh le cangka kum 19 minung Chistopher Vialva nih meithal in a kah hna i, cu in cun Bernard nih an mawtaw cu mei in a khangh beh.
Bernard nih mei in mawtaw a khangh hlan tein nuva hna hi an thi diam cang lai, tiah Bernard te lei nih an hlanmi sihni pawl nih an chim. Stacie hrim hi cu mei nih a kangh hna hlan tein a thih cangnak kong siai lei tehte nih a langhter ko, tiin an hlanmi independent investigator nih a chim. Todd Bagley hi cop le cilh in a thi colh ko nain, Stacie tu hi cu a hromhrawl ah leidip a lutmi an hmuh. Cu nih cun meithal hma in a thih si lo in, mei khu ai dawp ruangah a thimi a si a langhter, tiah cozah lei biachimtu hna nih an chim.
Vialva nih nawl a pekmi hi Bernard nih zul duh lo in hei al sual sehlaw, kha nih ah khan Bernard nih zei khi dek a hei ton hnga, tiin a sihni nih a chim. Vialva kha cu September ah khan thihdaan an pek cang. A taangmi an hawi le pawl tu cu kum 18 minung an si lio a si caah, thong lawng an thlak hna i, kum tlinglo misual ah an chiahpiak hna.
Bernard hi thonginn a um chung vialte chimh ngai tein a um ko caah le, sualnak a tuahtu minung pawl thlohnak rian zongah a tuan ko caah, thihdaan pek lo in, a chanchung thonginn tu ah caan hmang dingin bia khiahpiak u law a tha, tiin a sihni nih an chim.
Bernard a aiawhtu hi mizeidah a si? Bernard thihdaan peknak kongah a aiawhin biachimtu hi federal sihni pakhat a si i, Bernard hi thihdaan pek lo in thonginn chung tu ah a chanchung umter dingin nawlnak a tuahtu a si. “Brandon i a thluak puitlin a panhnak kong le toidor lei a panhmi kong hi 2000 tein khan ka theih cang i, sualchir in thonginn chungah daitein a um kho cangmi a si. Thihdaan pek hrimhrim awk ah ai tlakmi misual hna lakah anih zong hi ai tel ve, tiin zeitindah kan ti khawh ning a si e?” tiin Indianapolis Star Angela Moore nih amah ruahnak he pehtlaiin capaar a chuah.
Bernard thihdaan tatnak an khiahmi hi vun ngai thiam hram law a tha, tiin a taangmi biaceihbawi 9 lakah 5 nih Trump an nawl. Cun, Senators Richard J Durbin le Cory Brooker telhchih in minung thong tampi nih a sual ngaihthiampiak dingin Trump cu an nawl. Thursday tiang zongah cun Bernard lei a tangmi sinah sihni Allen Dershowitz le Ken Starr zong ai vai fon ve.
Bernard thihdaan pek an timh cuahmah lio pi ah cun, an thahnak a ruang kongah i teltum ve i, mipi an hna tunter hna dingin Reality TV star Kim Kardashian West nih a tweeter followers pawl cu heh tiah a forh hna. Ms West nih California ah sihni tuan kho dingn ca cawn lio pi a si i, cu hlan zongah criminal cases an hmuhmai merpiak kho dingin bomhnak a pek bal. March ah khan Trump nih an thonglaak kum a thumhpiakmi hna nunau 3 he cun Ms West cu White House a vung tlawng.
Leave a Reply