Tu lio cu vawlei cung hmun tampi ah ti lianh a tlung a hleice in Asia ram ah a luan khun. Covid-19 pulrai zawtnak nih zeihmanh tuah kho loin vawlei cung a kan tlunh hnawh lio ah ram cheukhat ahcun ti lianh nih a tlun hnawh chih hna.
Cu hna lakah Bangladesh ram cu an ram cheuthum cheukhat cu ti lianh ruangah minung millions tampi inn le lo an zam tak i thlakhat leng ti a lian cang caah a tlawmbik minung 161 an thi cang tiah local media tarlanghmi ning in theih a si.
Padma tiva a lian i tiva kam pawl a cim caah Shimulyia tilawng dinhnak tiva kam hrawnghrang cu buri in these an chiah i khuami nih an satil pawl cu ti a phan lonak hmun ah an thial hna tiah theih a si. Khuami hna cu tilawng tete in um kal a si ti si.
Dhaka khualipi in khan 34 (miles) a hlatnak ah a ummi khua in ti lianh harnak a tongmi khuami hna cu bawmhnak an hmu cang ti si. Zeibantuk bawmhnak dah an pek timi tu cu langhter chih a si lo.
Tutan Bangladesh ram i ti lianh cu kum 20 leng chungah a caan saubik ti lianhnak a si caah facang cinnak lo acre 80000 hrawng ti nih a khuh dih tiah cinthlaknak lei vuanci zung nih an phuan.
Tu lio Coronavirus dohnak zong ti lianh ruangah a herh ning in an buaipi kho lo tiah theih a si. Bangladesh ram ahhin August 13 ni tiangah Covid-19 zawtnak a ngeimi minung 266000 leng an si i Covid-19 in minung 3513 an thi tiah theih a si.
Ref: DVB
Leave a Reply