India ram cu Covid mizaw an karh tuk cang. Nizan August 30 ni nikhat chung te ah Covid-19 case thar 78,761 an karh i July thla lio i US ah nikhat chung mizaw a karhbik ni case thar 77,299 nak in an tam deuh cang.
Vawlei cung pumpalulh ah nihin tiang Covid-19 mizaw diklak hi 25.2 million leng an si cang i cu chungah minung 840,000 leng an thi i minung 17.5 million nih damnak an hmuh than tiah theih a si. DVB nih a tarlangh.
Cucu kum khat chung i a zualhma ngai tiah ruah tawnmi swine flu nak hmanh in let 5 in a tam deuh tiah World Health Organization (WHO) nih an tuak ning an phuan ve.
Vawlei cung minung chah biknak India ram cu Covid-19 mizaw tambik American le Brazil ram hna a chantu a si i a pathumnak mizaw tambiknak ram a si.
India ram ah nihin August 31 ni tiang Covid-19 mizaw hi 3.6 million leng an si cang i cu chungah minung 64,000 leng an thi. A dam thanmi hi minung 2.7 million leng an si ve tiah theih a si.
India ram in Kawlram a tlungmi mizaw zong hi an tam pah ve cang caah tu lio hi India le Kawlram ramri ah biatak tein runvennak an tuah liopi zong si. Tuanvo ngeitu hna zong nih tu lio cu biatak deuh in ramri vennak le cheknak kan tuah tiah kan hnu DVB nih a tarlangh ve.
Ref: DVB
Leave a Reply