CDF-Kanpetlet le CDF-Mindat ttang tti in SAC ralhrang he i kahdohnak a fah chin bantuk in nihin July 30 ah SAC nih ralkap thazaang chapnak voi 2 tiang a tuah chap. Nihin zinglei sml. 11:00 hrawng ah Saw khua lei in SAC ralhrang motor 4 le helicopter in Kyauhtuh SAC ralhrang hmunkhuarnak ah thazaang chapnak an tuah cang.
Kyauhtuh hi Mindat he meng 18 hrawng a hlatnak ah a ummi a si i, Thlanglei Laitlang raldohnak ca ah SAC nih abiapi bik hmunkhuarnak ah a hmanmi a si. Kyauhtuh ah ralkap vanlawng bual a um i cuka in cun Mindat lei ah ralhriam ngan miakpi (Artillery) in an kah khawh fawn. Nihin chun sml. 12:00 hrawng ah a dang Helicopter pakhat Kyauhtuh vanlawng bual ah a ttum tthan.
Nizaan July 29 ah Mindat le Kanpetlet karlak ah kahdohnak fak ngaiin a chuak i, SAC ralhrang lei in a thimi le hliam a pumi an tam caah hnu ah an kir tthan, tiah CDF-Mindat ttuanvo ngeitu hna nih an chim. Cu lawng si loin July 29 zaanlei sml. 6:00 hrawng zong ah Mindat le Matupi karlak ah kahdohnak a um tthan.
Mindat le Kanpetlet peng chung kahdohnak ruang ah ralzaam zong an karh chinchin. I kahdohnak pehzul in a um ruang ah le nikhua a chiat ruang ah kap hnih kahdohnak ah hliam a pumi le a thimi cazin fiang in an fehter kho lo.crd-The Chin Journal
Thawng dang: Hakha Peng COVID-19 Runvennak Rian ca ah Mino 100 Leng Pum an i Pe, Hakha peng COVID-19 runvennak le mizaw pawl zohkhenh thlopbulnak rian ca ah mino 100 leng nih pum an i pe, tiah Hakha Township Public Healthcare (HTPH) nih thawngthanhnak ah an langhter. Volunteer pawl cawnpiaknak cu HBA le Zion ah July 25, 26, 27 ah an tuah i sii lei fimthiamnak a cawng liomi Medical Student mino 17 telh in pum aa pemi mino 100 leng an si hna.
June 10 thawk in Hakha ah COVID-19 zawtnak a ngeimi minung 300 leng hmuh an si i minung 8 an nunnak a liam. July 26 tiang ah minung 211 nih damnak an hmu. Nihin (July 28) zong ah minung 22 an check hna i minung 8 sin in zawtnak an hmuh tthan, tiah kan theih.crd-The Chin Journa.
Leave a Reply