November 7, zing ah Chin ramkulh, Kanpetlet peng, mipi ralkap CDF – Kanpetlet ralbawi Asset Commender Salai Hleih Manga hringtu a pa cu Magway ramṭhen, Saw khuapi a kal lio ah, SAC ralhrang nih an rak tlaih, tiah theih asi. A pa an tlaihkhih piakmi CDF-Kanpetlet ralbawi Asset Commender Salai Hleih Manga cu hringtu a pa chanhchuah dingin a va kalnak ah SAC ralhrang nih an pafa in an rak kah thah hna, tiah an chim. Hi thil a cannak hmun hi Chim ramkulh le Magway ramṭhen karlak ah asi i kadohnak le a ruang umlo in SAC ralhrang nih atu bantuk in an kahthah hna hi a si, tiah tualchung mi hna nih an chim.
Thawng dang: Panwa SAC Ralhrang Kuttang Ah A Ummi NDAK Ralthuam Chiahnak Hmunpi A Kaang. Kachin ramkulh, Chiphue peng, Panwa khuapi SAC ralhrang kuttang ah a ummi NDAK ralthuam chiahnak hmunpi cu ciam dihlak in mei nih a kangh, tiah tualchungmi hna nih Yangon Khit Thit ah an chim. November 8, zaanlei suimilaam 4:30 tluk khan Panwa khuapi SAC ralhrang kuttang ah a ummi Kachin Democratic New Army (NDAK) ralthuam chiahnak hmunpi cu mei nih ciam dihlak in a kangh, hi kong he pehtlai in, tualchungmi nih an chim mi cu mi pakhat khat nih mei in an khangh piak hna i a si lai, tiah an chim.
Zei bantuk kahdohnak hmenh a umlo, mi pakhat khat nih an khangh i a si lai Zhabumtin Ye-U SAC ralhrang hna ralthuam chiahnak hmun a si. Mipi zong an i lawm tuk” tiah tualchungmi pakhat nih a chim. Ralthuam chiahnak hmun ah hin, hriamngan, meithal kuan le ralthuam phun phun anum mei hmih dingin a neih zong an neih ngam lo tiah theih asi. Thawng dang: Shwebo Peng Meithat Zung Hmunpi Telh In Puahkehnak A Chuak, Minung 40 Leng Nih Hliam An Tuar I Cozah Rianṭuantu 1 Nunnak A Liam. November 8, zing suimilaam 10:00 tluk ah Sagaing ramṭhen,
Shwebo peng, Sipintharyar chawdawr pawng ah ummi meithat zung ah puahkehnak a chuak i hliamtuar mi an tam, tiah theih asi. Sagaing ramṭhen, meithat zung he naihniam mi pakhat nih “puahkehnak hi mi pakhat khat nih bomb a hmenh caah a si kho. Hlathlainak an tuah cuahmah lio a si. Puahkehnak ruang ah Peo Phyo Aung le a dang 1 nih hliamhma an tuar” tiah a chim. Cu bantuk ṭhiam in November 7 ah Shwebo peng Motor chiahnak hmun puahkehnak a chuak mi in khualtlawng mi 2 hliamhma an tuar.
Cu pinah Shwebo peng MyinChaung khua ṭhitumhnak puai tuahnak hmunpi cu drone in bomb an thlakhnawh ruang ah ngandamnak rianṭuan tu sii-bawi nu pakhat nunnak a liam i mipi 30 renglo nih hliamhma an tuar, tiah tualchung mi hna nih an chim. November 7, zaan ah Ye-U pengkomh, Tabayin peng cozah rianṭuantu umnak inn pakhat cu cunglei drone hmang in an kah caah ngakchia 10 nih hliamhma an tuar, tiah theih a si. Suimilam 24, nikhat chung lawng ah Shwebo peng i puahkehnak a chuak mi ruang ah minung 40 naak tlawmlo hliamhma an tuar, tiah an langhter chih.crd-Lungmiliu Post.
Leave a Reply