CDF Pasaltha Hna Nih Ralhrang 15 Bak An Tlaih Hna

CDF-Daai nih Rakhine in a Zaam mi SAC Ralkap 15 an Tlaih Hna, CDF-Daai nih Rakhine ramkulh kahdohnak in a zaam mi SAC ralkap minung 15 an tlaih hna, tiah CDF-Daai tuanvo ngeitu upa sin in thawng kan theih. Rakhine ram in a zaam mi SAC ralkap 15 cu nizan January 30 ah Daai hmunram pakhat ah CDF-Daai nih an tlaih hna hi a si. Hi kong he pehtlai hin CDF-Daai upa pakhat nih, “Atu tlaih mi hna hi Rakhine ram in a zaam mi an si. Nizan ah khan ramlak ah kan tlaih hna. Anmah chung ah hin ralbawi zong tam ngai an i tel,” tiah The Hakha Post ah a chim.

An tlaih mi hna SAC ralkap 15 chung ah hin mi tam deuh nih an meithal zong an in ken hna, tiah kan theih. Thawng dang relchap- Kyauktaw Hrambunh SAC Ralhrang Sakhan Cu AA Nih An Laak, Hriamnam Tam Ngai Zong An Laak Chih, Rakhine ramkulh, Kyauktaw hrambunh Khah-mah-yiah 374 Battalion SAC ralhrang sakhan cu AA nih nizan January 30 ah tlamtlingte in kan laak khawh i hriamnam tam ngai zong kan laak chih khawh, tiah Rakhine ralkap AA nih thawng an thanh.

2024, January 28 zong ah Minbya khuapi hrambunh Khah-mah-yiah 380 Battalion SAC ralhrang sakhan cu Rakhine ralkap AA nih tlamtlingte in an laak khawh cang. Rakhine ralkap AA cu Kyauktaw, Mrauk-U, Minbya khuapi hna ah a taang rih mi SAC ralhrang sakhan pawl zong laak dih dingin kahdohnak a tuah lio a si i, cu sakhan pawl cu kan laak khawh dih lai, tiah an langhter. Cu bantuk ṭhiam in Yanbye khuapi cu SAC ralhrang nih cunglei le hriamngan in an kah i Yanbye khuapi ah thazaang chap dingin an thlah mi.

SAC ralhrang pawl le Rakhine ralkap AA cu khuapi chung ah kap 2 kar kahdohnak a chuak i kap 2 thimi le hliamtuar an um. Cu kahdohnak ah SAC ralhrang lei in a thimi ruak, hriamthil cheukhat le nizan January 30 ah SAC ralhrang nih cunglei in hriamnam a chanh mi cheukhat cu Rakhine ralkap AA nih an laak khawh, tiah an langhter chih.

Kyauktaw, Mrauk-U, Minbya le Rathedaung khuapi um SAC ralhrang sakhan dihlak cu Rakhine ralkap AA nih pakhat hmanh taang lo in laak dih ding ah an luhhnawh i kahdohnak faak ngai in a chuak. Rakhine ralkap AA nih SAC ralhrang sakhan pawl cu pakhat hnu pakhat in a laak khawh hna, tiah AA nih thawng an thanh mi ah an langhter chih.

Leave a Comment

Leave a Reply

Your email address will not be published. Required fields are marked *