CDF-Thantlang Nih Mizapi Sin Ah Thawng An Thanh Cang Hih

CDF-Thantlang Nih Mizapi Sin Ah Thawng An Thanh, Ziknawh Eihmuar An Dohnak Zong An Langhter, CDF-Thantlang cu ralhrang uknak hrawh in Chin miphun nih mahte khuakhan lairelnak kan ngeih khawh nakhnga le Federal Democracy ramkomh sernak ding ca ah dothlennak a tuah cuahmah mi a si bantuk in ralkap lei lawng si lo in caan karlak zatlang uknak zong mizapi thazaang hmang in kalpi cuahmah a si, Chinland Defense Force-Thantlang nih January 8 ah cathanh an chuah.

Atu lio caan hi kan miphun le kan ram sersiam lio caan a si bantuk in kan miphun le kan khuatlang ah ziknawh eihmuar doh in dinfelnak a len khawh nakhnga kan i zuam a herhtuk lio caan zong a si. Cucaah CDF-Thantlang, Council tawlrelnak chung ah a ummi zung le hmunhma paoh ah a ruang/kong ummi (biaceih liomi kong, pumpak chungkhar le khuatlang ca bawmhhalnak tibantuk) he pehtlai in lenkai tik ah kutput tangka, ar le dinei ding tibantuk pawl i ken lo ding a si lai.

Nan i ken sual zong ah cohlan nan si lai lo, tiah Chinland Defense Force-Thantlang nih cathanh an chuahmi ah an langhter chih. Thawng dang relchap- SAC Nih Cunglei Kahdohnak A Tuahmi Ruang Ah Mipi 900 Deng An Nunnak Liam Cang, SAC ralhrang nih hramhram in nawlngeihnak a laak in 2023, December 31 tiang ah cunglei kahdohnak a tuahmi ruang ah ngakchia hna telh in mipi 900 deng an nunnak a liam cang, tiah NUG runvennak vuanci zung nih nizan January 9 ah thawng an thanh.

2024, January 7 lio ah Sagaing ramṭhen, Tamu pengkomh, Kanan khua cu SAC ralhrang nih raltuknak vanlawng in bomb a thlakmi he pehtlai in thawng an thanh hi a si. NUG cozah nih cazin an laak khawh mi ah kum 3 tluk deng caan chung ah SAC ralhrang nih Myanmar ram chung ah cunglei kahdohnak voi 583 tiang a tuah cang i cu kahdohnak ruang ah ngakchia hna telh in mipi 897 an nunnak a liam cang. Cu pinah biaknak lei he aa pehtlai mi inn 76 le sianginn 52 zong a rawk chih.

SAC ralhrang cu kahdohnak le ramkhel kong ah a thazaang a der ngai cang caah cunglei in a thazaang ṭhawngmi bomb pawl a hman hna i mizapi sinah phungning lo in thahnawnnak a tuahmi tette pawl zong kan ngeih hna, tiah NUG runvennak vuanci zung nihcun an langhter. SAC ralhrang nih Asian hnatlakpi mi phungphai 5 le UNO nih Myanmar ram ca ah biakhiahnak a tuahmi 2669 hna cu zul duh lo in ngakchia hna thahnawnnak, hliamtuar ternak, biaknak he aa pehtlai mi inn hna le sianginn pawl cu tinh chihte in kahdohnak a tuah pinah phungning lo in thahnawnnak a tuah caah humhimnak.

Council lei zong nih ram pumpi huap biaceihzung ah kuat ding in nuhrincovo lei he aa pehtlai mi an lu bik (Great Commissioner) nih forhfialnak a tuah. 2024, January 7 ah Kanan khua um biakinn ah aa pum liomi tualchung mi hna cu SAC ralhrang nih cunglei in bomb a thlak caah kum 5 in kum 17 karlak ngakchia 9 telh in minung 17 an nunnak a liam i kum 3 in kum 17 karlak ngakchia 11 telh in a tlawm bik minung 19 nih hliamhma an tuar, tiah Rev. Ram Tin Ceu nih Lungmili Post ah a chim ve.

SAC ralhrang nih phungning lo in a tuahmi chung ah aa telmi hna, thazaang a petu hna le ṭuanvo ngeitu hna cu NUG nih tlaih khawh dih ding in aa zuam lio a si bantuk in SAC ralhrang nih a tuhmi a zuun khawhnak ding ah tazacuai khawh a si naklai zong NUG cozah nih ram pumpi huap in nawlnak a tuah, crd- Lungmili Post.

Leave a Comment

Leave a Reply

Your email address will not be published. Required fields are marked *