Falam Peng Ah CDF-Thantlang Pakhat Nih Ngakchia Pakhat Meithal In A Kah I Hliam A Tuar, Chin ramkulh, Falam peng Haimual khuami Salai Ro Pek Hlu(kum 14) cu September 13 ah CDF-Thantlang ralkap pakhat nih meithal in a kah i a kehlei khuk a khen ruangah hliam a tuar, tiah Zalen nih a ṭial. CDF-Thantlang ralkap cheukhat cu September 13 chun ah zu an ri i Falam peng Ngaihlan le Zongte khua karah meithal an puah. Zanlei ah Haimual khua ah an lut i tikuang ah kutke aa ṭawlmi Salai Ro Pek Hlu cu meithal in an kah.
Salai Ro Pek Hlu cu a kehlei khuk ah meithal kuan nih tleng lak in a khen, tiah Zalen nih cun a langhter. Hi kong he pehtlai in CDF-Thantlang upa pakhat nih cun, sualnak a tuahtu cungah a herhning in ṭuanvo kan laak lai i, dantatnak zong kan pek lai, tiah The Chin Post ah a chim. Salai Ro Pek Hlu cu hliam a tuar zan ah Victoria Base ah CDF-Thantlang nih an kalpi colh i September 14 ah khuaihlainak an tuah. CDF-Thantlang, Khualhring tlang sakhan uktu le a ralkap nih hliam tuarmi inn chungkhar cu an va nawl hna i, sii thlopnak ca ah kyats sing 10 an pek hna, tiah theih a si.
Haimual khuabawi pa nih cun, “Meithal in a kaptu pa hi CDF-Thantlang Commando a si i kum 25 hrawng a si. Khualhringtlang sakhan hmu nih cun upadi ningin dantatnak kan pek lai. Cu pinah CNO upa hna zong kan khua ah an rak phan i upadi ningin dantatnak kan pek lai an kan ti. Voidang ahcun hi bantuk buaibainak hi kan tong bal hraw lo nain thinlung a nuam lomi thil tete cu a rak um pah ko ,” tiah Zalen ah a chim. Hliam a tuarmi pate a chungkhar hi lothlawh thingphorh in aa cawmmi an si i an har ngaingai, tiah theih a si, crd- The Chin Post.
Thawng dang relchap- Aung San Suu Kyi Nunnak Ah Harnak An Pek Ahcun SAC Nih Ṭuanvo An Laak Lai, NLD Chairman Aung San Suu Kyi cu harnak an pek i thihloh tiang a ton sual ahcun SAC nih ṭuanvo an laak lai, tiah NLD Central Committee nih nihin September 14 ah an thanh. Hramhram in SAC nih an tlaihmi Aung San Suu Kyi cu a luat khawh nakding ah UN, Europe ram hna, Tuluk le ASEAN chungtel hna nih SAC cu pumpak zong in an ton pinah a lam phunphun in an tawlrel ko nain.
SAC nih cun an nawlngeihnak saupi a hmunh khawh nakding ah Suu Kyi cu an chuah duh lo, tiah NLD nih cun an langhter. Suu Kyi cu SAC nih zapi nih hngalh lonak hmun ah an chiah i ramkhel thongtla pakhat a sinak in a hmuh ding a simi thil zong an pek lo leng ah a ngandamnak zong ṭha tein in an zoh lo i ngandamnak he aa tlakmi tirawl zong an pe lo. Kum 78 a simi Aung San San Suu Kyi nunnak cu SAC nih ṭha tein an zohkhenh lo ruangah pakhat khat thih loh a tonsual a si ahcun nawlngeihnak latu.
SAC nih ṭuanvo an laak dih lai, tiah an thanh. Cu pinah NLD nih Suu Kyi le ramkhel thongtla dihlak cu a rannak in an chuah khawh nakhnga ah UN, ASEAN le a pawngkam ram hruaitu, ramkip Community le ramchung ramleng dohthlennak phu hna izuamnak cung zong ah upatnak kan in pek hna, tiah NLD Nih cun an langhter.
Leave a Reply