CDF-Tonzang Battalion 3 A Luhhnawhtu ZRA Cu Teirul Kan Cham Hna Lai

SAC ralkap he i bawm in CDF-Tonzang Battalion 3 sakhan a luhhnawhtu ZRA cu teirul kan cham hna lai, tiah CDF-Tonzang nih September 5 ah an thanh. “ZRA doh dingin CDF-Tonzang hi kan rak dirhmi a si lo, SAC ralkap doh ding tu ah a si. Asinain kan sakhan an kan luhhnawh caah kan doh ve hrimhrim cang hna lai,” tiah CDF-Tonzang Secretary Thang Sun Mung nih a chim. Zomi Revolutionary Army(ZRA) cu anmah hmunram kilven khawhnak ca ah rak dirhmi hriamtlai phu a si tiin rak pompiak an si ko nain.

SAC ralkap he an i fonh caah anmah doh ve cang dingin an itimhnak kong CDF-Tonzang nih an langhter. August 31 ah CDF-Tonzang Battalion 3 sakhan cu ZRA le SAC ralkap i bawm in an rak luhhnawh ruangah CDF-Tonzang ralkap pakhat a nunnak a liam i Drone 2, 60mm zun khat, 40mm zun khat, RPG zun khat, meithal kuan 1,000 hrawng le cycle 7 an rak chuh hna. September 1 ah ZRA nih an rak thanh ning ah mizei hriamtlai poh Zomi hmunram in chuak u, tiah an rak langhter.

ZRA ah hin ralkap 200 hrawng an um i ramri hngaktu ah SAC ralkap he an i bawm. SAC ralkap nih hriamnam zong in an bawmh hna, tiah CDF-Tonzang Secretary nih a chim. ZRA cu Chin ramkulh chaklei Tedim le Tonzang peng ah hrambunh in SAC ralkap a doh cuahmahtu CDF sakhan cheukkhat an rak kah pinah CNA le CDF he zong aa kap tawnmi an si.crd- The Chin Post. Thawng dang rel chap, Sagaing ramṭhen, Kalaymyo peng ah a luancia August 27 ah SAC ralkap nih chekhlatnak an tuahmi kum 30 tluk.

Chin nu pakhat cu an tukvelhnak hliam a fah tuk ruangah nizan September 5 zanlei ah a nunnak a liam, tiah theih a si. Pyidawthar khua ah a ummi kum 30 hrawng Du Daih Huai le a hawinu cu Kalaymyo ah an kal i SAC ralkap nih, an cycle, phone le tangka bawm an chuh hna pinah Du Daih Huai cu an tukvelh i, cycle le phone cu kyats 50,000 in nidang ah rak tlanh dingin an chimh, tiah tualchung mi hna nih an chim.

Faak tuk in an tuk an velh hnu ah cycle le phone cu kyats 50,000 in tlanh ding ah an chimh. A cycle le a phone cu kyats 50,000 in a va tlanh lai ni zingka ah ruah lo piin a lu faak, a hnakhaw in thi a chuak i Kalaymyo sii-inn ah an va tlikpi nain a dam hlei lo caah Mandalay sii-inn ah an kalpi. Mandalay sii-inn an kalpi lio lam tanṭim ah a hliamhma tuar kho loin September 5 zanlei ah a nunnak a liam, tiah Chin World nih a ṭial.

Cu bantukin a luancia August 27 lio zong ah Kalaymyo in Tahan lei kap ah cycle in a kalmi nu pahnih cu SAC ralkap nih licence an ngei lo tiin tangka sing 5 an hal hna. Nan kan pek lo ahcun kan in tlaih hna lai tiin thir kutkhih an khih hna. An ngeihchun Kyats sing 3 cu i laak u an ti hna i an thlah ṭhan hna, tiah Kalaymyo ummi hna nih an chim.

Leave a Comment

Leave a Reply

Your email address will not be published. Required fields are marked *