CDM A Tuahmi Pawl Ap Ding In Myanmar Ralkap Nih CNF/A An Hal

CNF/A hruaitu cheukhat le Myanmar ralkap Northern Command ralbawi cu March 10 zanlei sml. 4:00 ah Hakha khua ah ton biaruahnak an ngei hna i CDM a tuahmi palik pawl Myanmar ralkap kut ah ap ding in CNF/A sin ah an hal hna, tiah thawng kan theih. Myanmar ralkap lei nih atu bantuk in an hal hna nain CNF/A lei nih kan sin ah CDM a tuahmi palik an um lo.

India lei ah an zaam dih cang, tiah an leh hna. Cun, CNF/A lei zong nih (1) Myanmar ralkap (SAC) nih nan tlaihmi vialte hna thlah dih ding le (2) Dai tein lam a zawhmi pawl hnanawhnak pek lo ding tiah Myanmar ralkap cu an chim ve hna.

Chin ramkulh chung ah ralkap a zaammi cheukhat an um bantuk in CDM a tuahmi palik zong 200 hrawng an um. Chinmi palik tampi CDM an tauh dih caah Hakha ah cun lamzawhtu tthenhmaltu ding palik an um ti lo i, Gangaw lei palik tu an cah hna, tiah kan theih,crd- The Chin Journal.

Ca dang relchap: Tlanglo khua ah nizan a riakmi ralkap 40 hrawng cu nihin ah kir rih loin an um i, CNF/A vice-chairman (3) Dr. Sui Khar nih ralbawi pahnih le an bodyguard pahnih cu nihin ah CNF/A Camp lei ah a kalpi hna, tiah Tlanglo khua biaknak lei upa pakhat nih The Chin Journal ah a chim.

Nizan kha Myanmar ralkap cu CNF/A Camp lei ah an kal i, zanleipi ah an rak kir hna. Tlanglo ah zaan an riat. Dr. Sui Khar a rak tlung i amah nih ralbawi pahnih le an bodyguard pahnih CNF/A Camp lei ah atu kha a kalpi hna. Dr. Sui Khar a rak phan i thil sining a tlamtling ko lai. Phan ding a um lo,” tiah a chim.

Atu Tlanglo ah ralkap 30 hrawng an taang i, CNF/A Camp lei ah a kalmi ralkap pali hi an hngak hna i a si lai. An hngahmi hna an phak cu an kir cang ko lai tiin kan ruah,” tiah a cunglei upa nih a chim chap, crd- The Chin Journal.

Leave a Comment

Leave a Reply

Your email address will not be published. Required fields are marked *