Civil Disobedience Movement (CDM) “The Truth Shall Make You Free” (John 8:32) Ralkap nih Mipi sin in Nawlngeihnak hramhram in an chuh mi duh lo ruang ah “Civil Disobedience Movement” (CDM) atuah mi vialte upatnak kan pek hna. Henry David Thoreau (1817-1862) nih “Civil Disobedience Movement” cu 1849 ah arak thawk. Henry David Thoreau nih achim mi cu: “Disobedience of Unjust Law” asi.
Achim duh mi cu: Adik lo mi le Ahman lo mi; Mipi hremnak ca le Salzuatnak caah; Zalawnnak ahrawktu le akhaamtu caah antuah mi Phunghram, Phunglam le Upadi vialte cu: Zulh lo ding; Buar ding; Hrawh ding kha, achim duh mi asi. Cu caah atu kan ram ah: Mipi hremnak caah siseh; Nuhrin Covo hmuh khawh lo ding in siseh; Zalawnnak buar ding in siseh; an ttial mi Phunghram (Constitution) le Upadi (Law) vialte zulh lo in, Hrawh le Buar khawh tu kha izuam ahau, ati duhnak asi.
Mahatma Gandhi (1869-1948) nih “Civil Disobedience” cu “Satyagraha” ati. Non-violence Resistance le Non-cooperation ti-in akal pi. Satyagraha ti cu: “Soul-force” le “Truth-force” asi. Achim duhmi cu: Thlarau thazaang le Biatak nih akan luat ter lai ti mi, Bible cawnpiaknak: Biatak nih an luat ter hna lai (The Truth shall Make You Free) ti mi he aa khat. Satyagraha (Non-violence Resistance) cu “Hind Swaraj” (Non-cooperation) he kalpi le hmantti asi.
Achim duhmi cu: Adinglo mi Uktu hna he zei hmanh tuah tti lo ding le ttuan tti lo ding asi. Cu caah: Ading lomi Acozah kuttang ah Ngunkhuai (tax) pek lo; Zungkai lo; Fial mi ttuan lo; Mipi-luatnak izuam lio (Freedom Struggle) ah Sianginn kai zong ahau lo, arak ti. Atu zong ading lo mi; Mipi sin in nawlngeihnak achut mi Ralkapcozah hi Kawmh lo; Bawmh lo; Zung zong kai lo; Ngunkhuai zong pek lo bak in um ding asi ko, ti nak asi.
Martin Luther King, Jr. (1929-1968) nih “Civil Disobedience” cu USA ah “Civil Rights Movement” in arak kal pi ve. Martin Luther King, Jr. nih adoh mi cu: USA ah Mi-nak le Mi-rang “Nuhrin Covo” aakhat tein hmuh ding kha aazuam mi asi. Pathian nih minung cu, amah muisam keng in aakhat te in akan ser (All Men Are Created Equal). Cucaah, USA ah aum mi Minak vialte zong Zalawnnak (Freedom), le Nuhrin Covo (Human Rights) tling tein kan ngeih ve, ati.
Chim duh mi cu, atu Burma ram ah, Tlangcung mi (Chin, Kachin, Karen, Karenni, Mon, Rakhine, Shan, etc.) zong nih Kawl he aakhat te in Nuhrin Covo kan ngeih ve. Zalawnnak kan ngeih ve. Mah le ram cio ah kan mah tein Uknak Nawl le Khua-khan Lairelnak Nawl (Self-determination) zong kan ngeih ve. Kan ram cu Democracy le Federal phung in kan ser tthan lai i, kan Covo vialte kan lak tthan lai, ti nak asi ko.
Cu caah, atu kan tuah mi “Civil Disobedience Movement” (CDM) cu: Biatak ah adir, Thiang Thlarau thazang ahman, Pathian sermi Minung vialte kan ni khat dih. Cu caah Pathian pek mi Nuhrin Covo zong aakhat te in kan hmuh lai. Pathian min in kan tei hrimhrim lai. Upatnak he, Dr. Lian Hmung Sakhong 2021-02-12 crd- the hakha times.
Leave a Reply