Chin Hriamtlai Phu CDF-Mindat, CNO, ZFU Le CNF Cu Tonnak Ngeih An I Tim

A liamcia 2023 December 7 ni ah rak dirh i fehter mi Chinland Council le tukum February 1 ni ah ser mi Chinram cozah ah a ruang tampi ruang ah aa tel kho rih lo mi CDF-Mindat, CNO/CNDF le ZFU/PDF-Zoland cu CNF he tonnak ngeih an i timh kong CNF Vice Chairman-3 Dr. Sui Khar nih People’s Spring ah a chim. CNF sawmnak cohlang in CDF-Mindat, CNO/CNDF le ZFU/PDF-Zoland cu CNF he tonnak ngeih an i tim i kaphnih kar hnatlaknak he a ralai mi March thla zarh khatnak ah tonbiaruahnak an ngei lai, tiah theih a si.

March thla zarh khatnak ah tonbiaruahnak ngeih aa tim mi Chin hriamtlai phu thum CDF-Mindat, CNO/CNDF le ZFU/PDF-Zoland zong Chinram cozah ah an zate in an i tel khawh nakhnga Chinland Council nih a ngeih mi phunghrampi zohchih in ceihmainak kan ngei lai, tiah CNF Vice Chairman-3 le Chinram cozah ah Foreign Minister a ṭuan lio mi Dr. Sui Khar nih cun People’s Spring ah a chim. Hi kong he pehtlai in CNO/CNDF ṭuanvo ngei Salai Peter Thang nih cun, “Tonnak ngeih ding kong he pehtlai in kanmah lei cu timhcia peng kan si ko.

Sina in March thla hramthawk ah tonbiaruahnak ngeih timh mi kong tu cu keimah pumpak nih zeihmanh theih mi ka ngei lo, ṭuanvo ngeitu dang he pehtlaihnak an rak ngeih chung bia si ṭheo lai,” tiah The Chin Post ah a chim. Thawng dang relchap- Tualchung Hriamtlai Phu Nih Chinram Zatuak 75 An Uk Khawh I SAC Ralkap Sakhan 24 Le Palik Sakhan 12 An Laak Cang, SAC ralkap nih hramhram in nawlngeihnak an laak kum 3 chung ah tualchung hriamtlai phu hna nih Chinram hmunram zatuak 75 an uk khawh, tiah Institute of Chin Affairs (ICA) nih an langhter.

SAC ralkap nih hramhram in nawlngeihnak an laak kum 3 chung ah Chinram ah SAC ralkap le tualchung hriamtlai phu kar kahdohnak voi 900 leng a chuak i, SAC ralkap sakhan 24 le palik sakhan 12 cu tualchung hriamtlai phu nih an laak khawh, tiah Institute of Chin Affairs (ICA) nih cun an langhter. Chinram ah tualchung hriamtlai phu nih an laak mi SAC ralkap sakhan le palik sakhan hna cu;- Kanpetlet peng ah Makuiingnu palik sakhan, Thantlang palik sakhan le Lungler ralkap sakhan, Falam peng Var ralkap sakhan, Rihkhuadar no. 1 le no.2 ralkap sakhan, Tibual ralkap sakhan, Meifar ralkap sakhan, Khampat khuapi palik sakhan le ralkap sakhan.

Tedim peng Kennedy tlang ralkap sakhan le Taingen ralkap sakhan, Matupi peng Lailenpi khuapi ralkap sakhan, Rezua ralkap sakhan, Thebuai ralkap sakhan, Hakha peng Bungzung ralkap sakhan, Paletwa peng Taronai Byuha ralkap sakhan, Hnonebu Byuha ralkap sakhan, Point 377 Khawe Byuha ralkap sakhan, Shinletwa ralkap sakhan, Taungshi Byuha ralkap sakhan, Khah-Lah-Yah 289 Battalion hmunpi, Khankha tlang Byuha ralkap sakhan.

Miwa ralkap sakhan le Hnamada Byuha ralkap sakhan hna an si, tiah Institute of Chin Affairs (ICA) nih cun an langhter.Surkhua khuapi palik sakhan, Hnaring khuapi palik sakhan, Vawngtu SAC ralkap sakhan, Sabawngte palik sakhan, Webula palik sakhan, Darkhai palik sakhan, Thantaung palik sakhan, Lungngu palik sakhan, Yangyi palik sakhan, Tikir palik sakhan, Hmawngtlang palik sakhan, Kaptel palik sakhan hna cu SAC ralkap nih an chuahtak mi sakhan an si, tiah theih a si.

Leave a Comment

Leave a Reply

Your email address will not be published. Required fields are marked *