Tu hi The Hakha Times nih Hakha Thantlang in Pene Candidates pawl biaral dohnak a tuah cuahmah lio a si. Cu Pene Candidates pawl biaral dohnak ah NLD party lei in Pene Candidate ahohmanh an I tel lo caah mipi lei nih an hlam ngai hna. Cu kong he pehtlaih mipi lei nih fianhnak kan tuah uh an timi cu biaraldohnak ah tuanvo ngeitu The Hakha Times founder Pu Pa Pui nih a tanglei bantukin fianternak a tuah.
Zeiruangah dah NLD candidate pakhat hmanh an i tel lo. The Hakha Times nih biaraldohnak nan tuahmi hi NLD lei in pakhat hmanh an i tel lo caah hi hi zeiruangah dah a si timi mitampi nih van kan fianh uh nan ti i fianh a hau lai ti kan ruah caah kan in fianh ta hna lai.
Hmasa kan chim cang bangin tutan biaral dohnak ahhin Hakha Thantlang ah a ummi Party dihlak, Myone Party lutlai dihlak phone ka chawn dih hna. Thawng kan thanh dih hna. Zaangfah tein nan Candidates pawl kan chim piak uh kan ti dih hna. Cun anmah Candidates pawl vialte zong phone kan chawnh dih hna. Ca kan kuat dih hna. Cun NLD lei kap zong hi an zung Hakha Thantlang kan chawnh ko hna.
Asinabeltein an kan let ning ahcun cunglei nih direct in hi bantuk debate le interview te pawl ahhin nanmah nih direct in fawi tukin nan cohlan hna lai lo tiah an kan ti ti si. Cun Hakha in Candidate pakhat nih cun hi hi cu kan tuah awk a si, nan kan tuahpiakmi hi kanmah ca zong ah a tha. Zapi ca zongah a tha. Kei cu ka cohlan, asinabeltein, cunglei ah ka van chimh lai i a ngah si ahcun kei cu tel ka duh a kan ti.
Asinain Candidate pakhat nih cun cunglei Center (Baho) nih nan rak i tel lo ah a tha tiah an kan ti caah tutan hi kan i tel kho lai lo e tiah tu zing ahkhan a kan ti. Le tutan ah kanmah zong kan lung a that lo ngaimi cu zapi nan caah kan Candidate dihlak an mui hmu dih hna u ti kan duh hringhran. Kanmah lei kap zong nih a si khawh chung in kan i zuam.
Cun NLD lei in Candidate zong nih pumpak in tel a duhmi an um hrimhrim ti kan hngalh. Asinabeltein Myone party le cunglei ah nawl an hal tikah nawl an ngah lo caah tutan ahhin telh a duh ko nain aa tel kho lomi zong an um caah zaangfah tein a rak kan hlamtu, NLD tha a petu zong nan si ah, cun a dang nan si zongah rak kan ruah thiam hram uh ti kha zaangfah kan van in nawl hna.
Ruah awk: Ruah awk a ummi cu nihin Hakha Thantlang Pene Candidates pawl biaraldohnak tuah liomi thil hmete hmanh ah NLD candidates pawl cu cunglei Baho nih nawl a ngeih hna tikah NLD cu Kawl party, Kawl hruai ning in kar a hlangmi, Kawl nawl loin zeihmanh a colcang kho lomi, cunglei Center cungtel pawl nawlpeknak loin zeihmanh a tuah kho lomi, cunglei nawlpek nak um lawngah thil a tuah khomi etc. an sinak a langhter.
Hnu lei a liancia kong chim a hau ti lo nan theih cia dih. Cucaah Chin NLD Baho nawl loin zeihmanh a tuah kholomi, cunglei Baho nawl lawng in thil a tuahmi hi Chinmi nih mee kan pek awk a si maw si lo timi cu a lungfimmi nih ruat khawh a si cang.
Leave a Reply