Chin NLD MP Hna Cu A Minung  In Chin, An Nawlngeihnak In Kawl An Si

NLD MP Chin an si ko kan ti lengmang i Chinram i a minung cu Chin an si taktak ko nain an nawlngeihnak cu Kawl an si. NCA biaruahnak ah teinak a hmu lomi Party tel khawh a si lo tiah Daw Suh nih a van ti tikah Chin a si ko mi NLD kan MP pawl cu ziah an thutter kun hna lo?  NLD kan MP cu Chin an si tak khe tung?  A minung kha Chin MP an si ko nain Chin aiawhtu MP an silo caah Chin an si nain Kawl nawlngeihnak tangah an thu dir ti a lang.

Nai Media biaruahnak zongah cunglei nih an sianh hna lo caah anmah nawl in tuah awk le that lo tikah NLD pawl cu pakhat hmanh an mui a de lo cu mu. Chinram kan MP pawl NLD khi Chin an si ko nain Chin aiawh thutnak ah an thutter hna khi ruah ngai awk a si cang lo maw?  Miphun tling kan si venak a langhnak dingah NCA biaruahnak ah Chin miphun aiawhtu Chin MP thu ve cang seh ti kan duh.

Tulio ah Naypitaw ah Chin kan palai (NLD) pawl Pu Siangawr Vanhnin, Pu Ngun Hei le Pu Joseph Hniar Uk hi zeidah an tuah hnga?  Ziah an thawngpang a daidup ko? Chinram caah zeidah an va chimrel i zeidah an kan tuahpiak?  Ziah mipi sinah an langh bal lo?  Democracy tangah thimnak phunhnih a um i direct le indirect ti a si. Cucaah tulio MP khi mipi kan aiawhtu le kan palai caah kha nangmah nih kan chimhpiak tiah thimmi an si nain mipi sinah an lang bal lo, MP vialte thimnak an petu hna khua hmanh nan phan than bal ti lo?

MP sinak hi i uarpi ding silo in mipi caah chimrelpiaktu ka si timi lungput he an thlahtu le a ai na awhpiakmi minung hna he ruahnak i cheuh lengmang kan hau ti hi kan philhpiak hlah uh. MP nan si cangka in Tender lawng bawh ti hlah uh. Mipi he i hla ti hlah uh. Zei Party nih MP nan va tlin zongah Mipi aiawhtu ah thimmi ka si caah Mipi he naihiam tein biaruahnak tuah lengmang ka hau i anmah duhmi chimrelpiak ka rian a si ti kha philh sawh ti hlah uh.

Kawl nih Chinram cu a lungtak in a dawt kho lai lo caah biachahnak pakhat a tuah or aa palh sual ruangah a tuartu Chinmi kan si lai. Midang caah zawnruahnak tel loin biachah cu a fawite caah kan ngaichiatnak a chuahpitu tampi a um i kan ton cangmi hmanh a um.

Kan biaknak zaa a long lo kan ti lengmang mi hi zoh tuah u sihlaw Kawlram thimnak pi cu Khrihfa pumh ni thengte ah tuah a si pinah home Crusade tuahmi hmanh thong an thlak hna i pumh an khamh nain ramkhel kong belte ah cun a za lengin an i but dih. COVID 19 hi kan biaknak hnursuannak tactics pakhat ah an hman cang hi kan fian ngai a hau.

Credit: Salai Pa Thawng