Chin Ramkulh Ah Bomb Lamsualnak In Minung 20 Nunnak A Liam I 37 Hliam An Tuar

SAC ralkap nih nawlngeihnak an laak hnu in Chin ramkulh ah 2023 August thla tiang ah vawlei tang hmanhmi bomb le SAC ralkap ralkap nih an tunhmi bomb ruangah minung 20 nunnak a liam i, minung 37 hliam an tuar, tiah CHRO nih September 11 ah an thanh. SAC ralkap nih chikkhat an i dinhnak biakinn le cacawnnak sianginn ah bomb an hmanhmi cu an kal hnu ah khuami hna nih an i lamhsual tawn, tiah CHRO ṭuanvo ngeitu pakhat a simi Salai Mang Hre Lian nih RFA ah a chim.

SAC ralkap hna nih hin bomb hmanh hna hlah sehlaw tualchung mi hna nih hi harnak hi kan tong hnga lo. An phaknak poh ah ti awk in bomb an hmanhmi cu an kaltaak caah tualchung mi hna an i lamh i, a hmun ah a thimi zong an um bantukin cheukhat cu kut kiakmi le ke kiakmi zong an um,” tiah a chim chap. 2021 kum ah hmanhmi bomb ruangah minung 4 nunnak a liam i minung 2 hliam an rak tuar. 2022 kum ah minung 9 an nunnak liam i 17 hliam an rak tuar.

2023 kum ah minung 7 nunnak a liam i 18 hliam an tuar, tiah CHRO nih cu an langhter, crd- The Chin Post. thawng dang relchap- Morocco Ram Lihnin Ruangah Minung 300 Deng Nunnak A Liam! Morocco ram laifang ah a faak ngai mi lihnin cu, nizan september 8, Morocco caan in zan suimilam 11 fai ah a chuak i minung 300 deng tluk nunnak a liam, tiah theih a si. Richter scale 6.8 in a ṭhawng mi lihnin cu Marrakech thlanglei vawlei tang 18.5 kilometre in a chuak i lihnin ruangah hin Marrakech khuapi le a dang khuapi innlo a rawk mi a tam pinah minung 300 deng nunnak a liam, tiah theih a si.

Atu tiang a thi mi cazin an laak mi hi minung 296 an phan i, hliam tuar mi an tam caah hi nakin a thimi an tam deuh kho. Ṭuanvo ngeitu hna nih an chim ning ah minung 150 hrawng hliam fak ngai an pu. UNESCO nih world herritage site ah a thimmi Marrakesh khuapi hlun chumtual ah a um mi inn pawl cu an cim dih. Lihnin a daih in thazaang a tlawm deuh mi lihnin(afterquake) nih a nolh ṭhan. Mipi cu inn chung um ngam loin lampi cung ah thinphang in an chuak dih.

Marrakech khuapi hi hlan lio thilhlun umnak khuapi pakhat a si i cuka khua a um mi inn pawl cu kum saupi a um cang mi an si caah lihnin nih a hrawh khawh deuh hna, tiah hlathlaitu hna nih an chim. Lihninh ruangah phone line vialte a tlau dih i khat le khat i pehtlaihnak ah harnak an tong. Mi bawmchantu hna zong innlo a cim mi tang ah mi an kawl hawl hna. Hliam tuarmi zeimawzat zong sii-inn an tlikpi hna. Morocco ram lihnin nih hin kilometre 350 tluk tiang aa hlatmi Casablanca(Morocco) le Azores(Portugal) ram tiang an va hnorsuan, tiah theih a si.

Leave a Comment

Leave a Reply

Your email address will not be published. Required fields are marked *