Chin Ramkulh Hakha Khuapi Thawngpang

Hakha Ah Atom Line A Tlaunak Zarh Khat Tluk A Si Cang, Phone Chawnhnak Ah Tualchung Mi Harnak An Tong, Chin ramkulh, Hakha khuapi ah Atom line a rawhnak zarhkhat tluk a si cang i tualchung mi hna harnak an tong ngai, tiah theih a si. November 25 in Hakha ah Atom line a rak rawk i nihin November 30 tiang zarh khat deng a rawk cang. Atom phone line a rawh caah phone chawnhnak zong a har ngaingai. Cu pinah Atom line in wifi a lami hna ca zong ah a har i line a chia ngaingai, tiah tualchung mi pakhat nih The Chin Post ah a chim.

Atom line hi Sagaing lei kap hrawngah a rawk an ti i, a rawhnak hmun hrawng hi kahdohnak a chuahnak hmun a si caah remh ding ah a har deuh tiin theih a si. Zeitik ah dah Atom line a ngah ṭhan te lai ti cu hngalh khawh a si rih lo,” tiah a chim chap. Atom wifi line a hmangmi hna nih atu kar hrawng cu wifi line a chia ngai, VPN pehpiak lawng ah line tlawmpal te a ngah cu hmanh cu a chia tuk, tiah an chim. Cu ṭhiamṭhiam in November 25 thawk in Falam zong ah Atom line a tlau ve.

Atom wifi line a hmangmi cheukhat cu ramdang um an chungkhar le hawikom hna he zong an i chawnbia kho ti lo, tiah tualchungmi nih an chim. Thawng dang relchap- Chin Ralkap Nih Khuapi 7 An Lak Cang Ram Pumpi Ah Chin Miphun Kan Mithmai A Hngal, Kawlram ah hriamtlaibu tampi an um i cu chungah Chin hriamtlaibu cu thazang a tlawm lei kan rak si. Asinain khuapau dohthlennak a chuah hnuin mino tampi hriam an tlai. Ramleng in chawva tampi kan bawm hna.

Cuticun minung thazang in siseh hriamnam thazang in siseh kan ṭhawng chin lengmang. Thiamnak lei zongah tampi kan ṭhangcho. Atu ah cun MAH nih “CNA cu hriamtlai ti tlak hmanh an si lo” tiah zeirel lo ngai in a rak chim mi cu aa lungretheihpi mi hriamtlai ah a cang. 1027 a chuah hnuin MNDAA, TNLA le AA nih Kokang hmunram ah SAC sakhan 200 dengmang an lak cang i khuapi (myo) 7 an lak hna. Sagaing ramṭhen ah khuapi 3 an lak, cu hna cu Kawlin, Khampat le Shwe Pyi Aye hna an si.

Cun Karenni ah Meseh khuapi an lak ve. CNA hruainak in Chin hriamtlai hna nih biatak tein kahdohnak an vun tuah i caan tawite chung ah khuapi (myo) 7 an lak. Kan thazang, kan hriamnam le caan tuak tikah Chin ralkap hna nih khuapi 7 an lak khawh mi cu a sunglawi taktak khi a si. Kan zapi kan ṭanrualnak thawngin Kawl miphun le miphun dang hna lakah Chin miphun kan mithmai a hngal ve cang. Pathian le kan ralkap hna thawngin a si.

Pathian nih kan Chin ralkap hna hmang in teinak lei ah a kan hruai cuahmah. Ramleng mipi zong tangka thawh i zuam chin ko usih.  Chin ralkap hna nih atu tiang an lak cang mi khuapi hna cu Hnaring, Surkhua, Makuinu, Weibulak, Rihkhawdar, Lailenpi le Rezua hna an si.

Leave a Comment

Leave a Reply

Your email address will not be published. Required fields are marked *