Chin Ramkulh Le Naga Thanchonak Caah India Cozah Nih Dollar Tam Tak A Bawmh Than

2020, August 28: Chin Ramkulh Le Naga Thanchonak Caah India Cozah Nih Dollar Tam Tak A Bawmh Than

Chin ramkulh le Naga Self-Administered Zone thanchonak caah India cozah nih Kawlram cozah cu American Dollar 5 million a bawmh tiah Yangon i Indian Embassy nih nihin ah a phuan. DVB nih a tarlangh.

Indian cozah nih Kawlram ah a rak thlakmi Indian ambassador Mr. Suresh Kumar nih nihin August 28 ni ah Union Minister for Border Affairs Lt-Gen. Ye Aung a ton pah in a pek hi a si.

2012 kum, May thla lio Indian Prime Minister Kawlram a tlawn lio ah ramhnih hnatlaknak minsen an thuhmi ah Chin ramkulh le Naga Self-Administered Zone caah a herhmi inn saknak le pawcawmnak rian thanchoternak caah kum khat ah American Dollar 5 million kan bawmh lai a timi a bawmh thanmi a si tiah theih a si.

Cu ramhnih hnatlaknak an tuah hnu kumthumnak ah an simanking (projects) pawl ning in Chin ramkulh ah lam/hlei 9 le sianginn 5 an sakpiak i khua khua 82 in minung 28,000 nih an hlawkpi tiah theih a si.

Cu bantuk thiamthiam in Naga Self-Administered Zone ah khua khua 80 an umnak myone 3 ah lam/hlei 14, sianginn 6 le ngandamnak lei i zohkhenhnak inn (sii inn) 1 an sak piak i minung 49,000 nih an hlawkpi ve tiah theih a si.

Atu tiang lam/hlei, sii inn le sianginn tibantuk an simanking 141 an lim cang i Indian cozah nih pehzulh tein bawmhnak a pek rih lai tiah nihin ah Indian Embassy nih an phuan tiah DVB nih a tarlangh hi a si.

Ref: DVB