Date: 22/09/2020: Chinram chungah a ummi tarnu tarpa, nupa farle le unau vialte hna sinah nawlnak ca kan kuat hna. Politics khelnak caan a si caah mah le dirpimi party tanh cio ding cu a phung a si. Kan ram hi ramdang bantukin uknak phunghrampi tlamtlingmi ngei cang usi law atu hi mah le duhmi party ah tanh le cawlcang ding a tha tuk nain kan ram sining ah luatnak a hmuh rih lomi ram kan si rih.
Kan ram hi 1948 ah mirang uknak in luatnak kan hmuh nain 1962 in Kawl ralkap uknak tangah kan tla cawlh. 2008 Phunghrampi ruangah Kawlram cu ralkap nih a kan uk than. Atu hi ralkap uknak tangah a ummi kan si. NLD cozah a kai ko nain uknak nawlngeihnak taktak cu 2008 phunghrampi ningin ralkap nawlngeihnak tangah a si ko.
NLD cozah a kai hnuah thawngtlami vialte NLD cozah nih a thlakmi an si lo. Ralkap nih a duh lomi thawngthlak. A thlah duhmi luatter le chuakter ti si ko. 2015 in NLD nih cozah a kai i kan ram caah a ti khawh chungin rian a tuan. Kum 5 chungah kan ram thanhchonak tampi a tuah nain a tuah kho rih lomi tampi a um rih.
NLD cozah a kai ka teah cun kan ram chungah mifir misual tlaihhrem, vawlei hmun chuh, inn hrawhpiak, dum hmun chuh tibantuk tampi a um nain kum 3 hnu cun a dai tuk cang. Mikhual cazin chek zong a um ti lo i kan hna a ngam tuk cang. Ralkap nawlngeihnak donghter dingah NLD nih a phunphun in khua a ruat.
Party dang cu pakhat hmanh an ruat kho lo lawng si loin a tuah khawh ding zong an si lo. Ralkap party USDP tu ah an bochan dih. Kum 5 chungah hi vial a tuahmi kan hmuh cang caah tukum hi NLD ah tanh rih u sih. Caan khatnak ah 2008 phunghrampi cu a remh kho rih lo caah Caan (2)nak hi tanh rih u sihlaw hi Caan (2)nak chungah Ralkap nawlngeihnak zong a donghter cang lai.
Ram le mipi ca zong thiltha tampi a kan tuahpiak lai ti zong hmuh cia a si ko. Hi Caan (2)nak chungah NLD cozah nih kan ruahchan bantikin a tuah khawh lo ahcun 2026 in cun tanh zong a hau ti lo. Kan duhmi party ah kan tanhpi cio cang lai. Tukum kum (5) ca tal hi cu kan ram le miphun dawtnak le zawnruatnak ngei buin NLD hi tanh cio hna u sih.
Kan ruah ningin thiltha tampi a chuakpi hrimhrim ko lai. Ralkap nawlngeihnak hi donghter a si cang hnucun ramdang bantukin kan duhmi party ah tel zongah policy thatha sak ciami chungah kal ding a si cang lai i aho President a tuan zong a poi ti lo, zei party nih cozah a kai zongah a poi ti lo. Zalawng tein ram hruai khawh a si cang lai.
Ka chim lengmang bantukin hruaitu cheukhat nih an thluak an hman i 2020 cu NLD nih cozah a tling kho lai lo, Coalition Cozah a si lai an ti, politics a hngalh huaha lomi cheukhat nih an zumh ve. Ralbawizik nih mah tluk a cawlcangmi hi zeiruabgah a si timi mipi nih an hngakh kho lo. NLD cozah a kai ding a fiang ko caah a hngilh kho ti lo.
Party hruaitu tampi meeting a sawm hna, a phunphun in ruahnak a cheu hna. Party tampi nih an tanh ve nain party tam deuhdeuh NLD caah Me tam deuhdeuh tinak si ko. Thimnak tuah ahcun NLD a tling lai ding an fiang cang caah thimnak tuah rih lo dingin rawkralnak lam phunphun an kawl.
Kan ram nih daihnak, thanhchonak le hnangamnak lei a panh khawh nakhnga tukum te hi cu party dang tanh loin NLD hi tanh cio u sih. Tukum Vote nih hin zungzal luatnak a si khawh bantukin zungzal ralkap sal sinak zong a si ve caah biatak tein khuaruat cio usih tiah kan nawl hna.
Credit: Laiki Chozah
Leave a Reply