Chin Unau Pathum Phu Ah CDF-Kanpetlet Battalion Panga Le MDF An I Fonh

CNDF, CDF-Mindat le PDF-Zoland nih an dirh mi “Unau Pathum Phu” ah CDF-Kanpelet tang ah a um mi Battalion panga le Maraland Defense Forces (MDF) an i fonh cang, tiah thawng kan theih. Unau Pathum Phu ah MDF an i fonhnak kong cu January 31 zing lei ah zapi theih ding in thawng an thanh i, January 31 zaanlei ah CDF-Kanpetlet zong nih Unau Pathum Phu ah an i fonhnak kong cathanh an chuah ve. CDF-Kanpetlet ah Battalion pasarih a um i, cu chung ah cun Battalion panga nih Unau Pathum Phu ah kan i fonh cang, tiah an thanh hi a si.

CDF-Mindat chung zong in Unau Pathum Phu ah a um mi le Chinland Council ah a um mi ti in phu hnih in an i ṭhen. Mindat peng, Circuit (4) le Circuit (11) ah a um mi mizapi nih Chinland Council ah i fonh kan duh an ti caah January 28 ah khan Chinland Council ah an i fonhnak kong cathanh an rak chuah. Unau Pathum Phu cu Chinland Council ah aa tel lo mi Chin hriamtlai phu pathum (CDF-Mindat, CNDF, PDF-Zoland) nih December 30 ah an rak dirh mi a si i, atu ah cun chungtel hriamtlai bu panga an i tel cang.

Thawng dang relchap- Meelaungchaung Khua Um SAC Sakhan Luhhnawh In An Kah, Ralhrang 6 An Thi I Meithal Zuun 3 An Laak, Tanintharyi ramṭhen, Palaw peng, Meelaungchaung khua ah umhmun khuarmi SAC ralhrang sakhan cu luhhnawh in an kah caah ralhrang 6 an thi pinah meithal zuun 3 an laak, tiah Myeik pengkomh battalion 1 chungin ṭuanvo ngeitu pakhat nih Khit Thit Media ah a chim. January 30, zing suimilam 5:30 tluk ah Palaw peng, Meelaungchaung khua ah umhmun khuarmi Pyusawhti le SAC ralhrang hna sakhan cu (KNDO), (PRDF) le ṭangṭi phufonh dang hna nih luhhnawh in an kah hna, tiah theih a si.

Kahdohnak a dih hnu zing suimilam 8:00 tluk ah SAC ralhrang sakhan cu mei in an khangh piak hna caah Pyusawhti le SAC ralhrang hna cu sakhan chuahtaak in hmundang ah an zaam, tiah kan theih. Cu hnu tlawmpal 8:30 tluk ah SAC ralhrang thazaang chap dingin Myeik khuapi lei ah rak chuakmi ralhrang cu Meelaungchaung khua ah an lut i, Mi-2 helicopter in mipi ralkap hna umnak hmun cu hriamngan in a kah caah mipi ralkap chungin hliamtuarmi an um.

Kahdohnak hmun ah SAC ralhrang 6 an thi, Meithal zuun 3 an laak, zing suimilam 10:00 tluk ah kahdohnak hmun in mipi ralkap hnu an kir, tiah theih a si. Kahdohnak ah aa telmi mipi ralkap phufonh hna cu Palaw PDF, Myeik pengkomh battalion 2, KND0 le PRDF ṭangṭi phufonh dang hna ansi, tiah Khit Thit Media nih alanghter.

Leave a Comment

Leave a Reply

Your email address will not be published. Required fields are marked *