(Kawl minung nih hruaimi party = Chin – Cawh Party = Kawl). Kawl miphun pical zong nih an huat ngai ngai tiah ka ruah mi cu “Mah miphun le ram kong ah miphun dang pa vai rawlh, vai sawm i ramchung ramkhel le thanchonak hnorsuan, aukhuan” hi a si rua tiah ka ruah.
Cu caah Kawl ralkap Cozah chan ah faktuk in renghnak ah an kan hman mi cu “Pyi-tuh-Tabaw-ttha” timi tlangtar in zulhphung bantuk Kawl miphun caah an ser. Cucu “Pi-pah-Aa-Ku-Pahsing-Zu” an ti i Kawl ram a himnak, an nunphung, Biaknak le caholh, ramkhel zalonnak an hmuh khawhnak ding ah tiah Kawl mipi zulh awk in an chiah.
Hi zawn te ah keimah fian ning in ahcun “Kan kong lam cu kan mah tein kan chim ve awk a si, kan ram caah kan miphun nih ttuanvo ngei ko usih, Mi phundang thazaang, ruahnak bochan in an kup taang ah sal bang in kun ti loin “Phundang in chim ahcun, Lai phungthluk nih Mi kut in rul tlaih” timi bantuk in ka lungfian ning a si.
Ka chin duhnak cu “Chin miphun zalonnak, mah te khuakhan lairelnak, kan ram sersiam tthan nak le thanchonak tbk vilate ah Kawl minung nih a uk mi Party taang ah kun, an nawl zulh” lengmang le an Party ah ruahchannak pek lengmang i timh hi. Cun a tang lei ah an tial rih mi cu (Kawlca khi Lai biaholh in ka leh tikah ka Laiholh nih a tlinh lo kho, nain ka chim duhnak nih cun a khen ko men lai).
- Rampi daihnak, thanchonak a hnorsuang tu, a hrawktu cu dohdarh hna ding
- Rampi kan kong lam ah hnahnawh nak, buainak a rak chuah ter tu ramdang minung pawl dohkalh hna ding
- Ramchung, ramleng in leirawinak an kan tuah tu cu kan ral nganbik (Common enemy) an si tiah an langhter.
A cung cabia hna hi Kawl minung, Kawl Uktu bawi pawl nih Kawl nunphung, Caholh le Biaknak, a ram a him khawhnak ding ah mipi nih zulh ding in a ser mi a si. A si le Chin cu Kawl kan si maw timi le Union of Burma kong ah ka fianning cu;
Kawl kut taang i kan luh hlan ah “Chin miphun cu nunphung, cabia tling he mah tein aa uk mi, kan ram te ah a ho hmanh nih rak pen lomi kan si. Panglong biakamnak in Union of Burma a dirh ve mi lawng kan si. Union of Burma cu kan dirh lai tiah biakamnak an tuah, asullam cu Union of Burma ah i fonh hna usih ti a si nain Chin kha Kawl timi ah kan thlen lai an ti lo. Union of Burma a dirhtu kan rak si nain, a dirhtu ah an kan ruat lo, zeitik hmanh ah an kut taang in chuak kho ti lo ding tuin an kan hren peng.
A si ahcun, Kawl minung le uktu pawl nih Kawlram, an caholh, nunphung le Biaknak, an pennak ram a him khawh nak ding ah zulhphung an ser mi khi, Chin miphun nih kan mah le kan ram, kan miphun himnak caah tiah kan mah hrang ah translate i tuah ve tuah usih= Chin mi kan ral nganbik cu a fiang colh ko cu mu.
Chin miphun kan zalennak, mah tein khuakhan lairel nak an kan chut tu, kan ram thanchonak, nunphung, zatlang nun le caholh a hrawk tu, kan Biaknak vialte a hrawk dih tu cu a hodah an si. Kum(70) leng Kawl uknak taang ah Chin miphun cu kan um cang. Kan miphun sinak, kan Biaknak ruang ah faktuk in doh le thah nawn kan si. Sal bantuk in an rak kan hrem, mithmuh kut-tongh a tampi, pumpak in kan tuarnak tial ahcun a tamtuk lai.
Chim duh mi cu, kan miphun, kan Biaknak, caholh le nunphung vialte hrawh dih, a ci hmih dih cikcek hnu ah an mah sinak ah hramhram in benh timh peng mi kan si. Cu ruang ahcun kan pale mifim, cawnnak sang le sinak sang, limhang puitling he a tthudir mi University student pawl, kan pale mifim tampi nih Meithal tlaih in ramtaang ah an luhnak le CNF in an dirnak zong a si. Kum 30 leng Meithal in an doh ve nak a ruang cu chim cawk lo a si. Ka langhter duh mi cu “Kan miphun himnak rian ah hin kan miphun, Chin party tein dir ko usih” timi hi asi.
Chin ram cu, Pathian nih Chin miphun caah a ser mi, nunphung le caholh puitling he a tthudir ve mi kan si nain nihin ahcun Kawl uknak taang ah kum(70) leng kan taang cang tiah kan chim lengmang.
Chin miphun le Chin ram nih zalennak, mah tein khuakhan lairelnak kan khel nak ah siseh, Chin miphun thanchonak le a hmai lei kong cu kan mah tein aa tawlrel ding kan si ve, Chin ram tawlrel tu ding ah Chin miphun cu Chin ram ah hrin kan si.
Kawl minung, Kawl party taang ah kum loin, kan duh mi a tlinnak ding ah ttuanti hawi bantuk tu in kan ser hna awk a si. Kan hmuitinh cu Chin minung, Chin party nih felfai tein kal pi uhsih law, daihnak, remnak a duh ve mi miphun dang party an um ahcun ttuanti hawi ah ser hna usih, an ke taang ah kun loin, an khuakhan mi kip yes pek in an sal bang an taang ah cawlcang loin, cabuai pakhat ah miphun sinak puitling, miphun sinak limhang puitling Chin ram caah, rampi caah khuakhang nak dirhmun, tlukruannak in Lairel khawhnak lam hi kan ngei ve lo maw? Cu cu kan mah Miphun lila nih kan mah tein kan ser ding mi cu a si fawn.
Credit: Salai Cung Dawt
Leave a Reply