China ram in USA ah a zammi Hong Kong Public Health School in virus kong specialist Scientist Dr. Li Meng-Yan nih Covid-19 cu Chinese cozah nih an chim bang sahring ngahring in a chuakmi si loin cozah ralkap Laboratory (Government Military Laboratory) nih an serchuakmi a si tiah August 3, 2020 ni ah a chim. Nain Dr. Li Meng-Yan chimmi cu Chinese cozah nih an al ve ti si.
Taiwanese News Agency Lude Press nih Live interview a tuahnak ah Dr. Li Meng-Yan nih, “Aa thokka in hi hi ralkap laboratory in a chuakmi a si tiah fiang tein ka theih cang. Sahring ngahring in a chuak an timi cu hlennak phunkhat a si. Hi kong hi cunglei nawl ngeitu sin ka chimh tikah zei ah an ka rel piak lo. Cunglei Communist Party hruaitu a chanchan in chimh ding le a fawimi a si fawn lo” tiah a chim.
“Hi kong hi ka phuan dih a si ahcun Hong Kong in sandahpiahtu hna bang in ka tlau ve kho timi kaa theih. Ka min hmanh a um ti hnga lo. Nain ka tlau hlan ah thil dik kawl ding tuanvo ka ngei tiah kaa ruah” tiah Dr. Li nih a chim chih.
Dr. Li Meng-Yan cu Communist party uknak tangah minung aa chuakmi le fimnak a cawngmi pakhat a si. Chinese cozah nih zeidah an tuah tawn i zeitindah an phising tthan tawn timi fiang tein a theih dihtu pakhat a si.
“Ramdang mi nih Chinese cozah kong nan theih i Chinese mipi nih an cozah an hrawk khawhnak hnga nan bawmh kho timi ruahchanhnak ka ngei. Cucaah hi pulrai zawtnak kong thil dik ning in ka phuan lai tiah chimh than ka duh. Hi kong hi ka chim phuan hlan ah ka nun himnak caah kan hnu April thla ahkhan Hong Kong in USA ka rak zam.
Tu thla thok Fox News Agency he tonnak an ngeih lio ah Chinese cozah nih pulrai zawtnak kong thil dik a phuantu hna cungah zeitluk in an hrem timi a theihnak kong le China in a zamnak ruang cu vawlei cung kha thil dik theihter a duh caah a si timi a chim hna.
Dr. Li Meng-Yan nih a kong a chimh ning ahcun amah cu vawlei cungah Corona virus kong a kherhhlai hmasabiktu Scientist pakhat ka si a ti. Amah nih hin SARS zawtnak he pehtlaihin WHO-Accredited University Laboratory in Superintendant Dr. Leo Poon hlathlaiter ding in biasu a chuah. Nain Chinese cozah nih ramdang thiamsang hna cu a ram chung ah hlathlainak tuahter an duh lo. Hong Kong in thiamsang hna zong hlathlaiter a duh hna lo. Cu ti cun ka hawile thazaang peknak in ka um sawh ko tiah a chim.
Dr. Li Meng-Yan nih a voikhatnak bik hlathlainak a tuah i a hmuh chuahmi pawl cu Superintendant sin a chim tikah dai tein um, na umtu na thudir i ralring tiah a leh a tong ti si. An sianginn in chimhnak nawlngeitu nih cun “Cu ni thok in Dr. Li Meng-Yan cu faculty member zong a si ti lo. Atu faculty members hna upatnak le hmaizahnak ah amah kong cu ka chimhter sawh hlah uh. Hi kongah nan ka theih thiam lai tiah ka ruahchan” tiah a chim ve.
Ref: Aphawmon
Leave a Reply