Chinland Council Hruaitu Meeting ah Chin Cozah Sernak Kong Khuakhan Lairelnak an Ngei

Chinland Council hruaitu hna a voi 2nak meeting cu January 25 in 26 tiang, nihnih chung an tuah i, Chin cozah sernak kong he pehtlai in khuakhan lairelnak an ngei, tiah thawng kan theih. Cu ton biaruahnak ah cun Parliament of Chinland, Government of Chinland le Supreme Court of Chinland ser nakding ca ah timhtuahnak an ngei, tiah Chinland Council nih thawng an chuah. Cu lawng si lo in Chinland Council a voi 2nak meeting tuah nakding kong he pehtlai in khuakhannak ngeih a si i, Chinland Council ah luh ding in a sok mi chungtel thar hna kong le runvennak kong zong ceihhmainak ngeih a si, tiah Chinland Council nih a langhter chap.

Chinland Council hruaitu hna a voi 1nak meeting cu December 11, 2023 ah khan Chinlung khua ah an rak tuah. Cu meeting ah cun phung sernak (Legislative), biaceihnak (Judiciary) le ukhruainak (Executive) ti mi tungtlang pathum sernak kong he pehtlai in khuakhan lairelnak an rak ngei. December 4-7, 2023 ah Victoria Base ah tuah mi Chinland Council tonpumhnak ah Chinland Constitution (Chinram Phunghrampi) fehter a si i, Chinland Council zong phungning in dirh a rak a si.

Thawng dag relchap- SAC Ralkap Vanlawng Accidentnak ah 12 an i Hliam, Pali an Zual, Nihin January 23, zinglei sml. 10:19 ah Mizoram, Aizawl khua pawng i Lengpuai Airport ah SAC ralkap vanlawng accident a ton caah minung pali an hliamhma a faak, tiah APF thawngzamhnak nih a langhter. Hi SAC ralkap vanlawng hi Tuluk ser Shaanxi Y-8 tiah min a pek mi a si i, Lengpuai Airport ah a ṭum lio ah atu bantuk in accident a ton hi a si.

Vanlawng chung ah SAC ralkap vanlawng rianṭuantu minung 14 an i cit i, minung 12 an i khawng. Aa khawng mi lak ah minung 4 hi an hliamhma a fak ngai, tiah AFP nih a langhter. “Hi vanlawng hi Myanmar in India ah a zaam mi SAC ralkap 276 lak ding in a rak ra mi a si. Atu bantuk in Lengpui Airport ah SAC vanlawng accident a ton caah Lengpui Airport vanlawng khuatlawnnak caan zong an thawn hna,” tiah The Times of India nih a ṭial.

SAC vanlawng a tlaknak kong he pehtlai in hlathlainak tuah ding in India ramchung vanlawng khualtlawnnak lei nawlngeitu (Directorate General of Civil Aviation) nih nawl a pek hna, tiah theih a si.

Leave a Comment

Leave a Reply

Your email address will not be published. Required fields are marked *