Chinland Council Nih Chinram Cozah Thar An Ser, Prime Minister Ah Pu Pa Thang Thim A Si

A voihnihnak Chinland Council meeting cu January 30-31 tiang Chinlung khuapi(Victoria Base) ah an tuah i tlamtling tein Chinram cozah thar an ser. A voihnihnak Chinland Council meeting ah Chinland phunghrampi ningin Chinland cozah Chief Minister, Miniters le ukhruainak tungtlang pathum fehternak an tuah kong Chinland Council nih an thanh. Chinmi hmunram le Chin miphun dihlak runven, Chin miphun ralkap ṭhawnter le Chin miphun dohthlennak ah Chinmi zapi dihlak i tel ding in kan i zuam lai, tiah Chinland Council nih an langhter.

A voihnihnak Chinland Council meeting ah Chinland Cozah lutlai thar thim an si i, Prime Minister Pu Pa Thang, Foreign Minister Dr. Sui Khar, Defense Minister Pu Thawng Za Lian, Attorney General Dr. Ṭial Hnin an si. Supreme court zong ser colh a si i, Chief Justice ah Pu Thomas Thang Nou, Judges Pu Mana Sheing le Pu Thang Yen hna an si. Thawng dang relchap- Chin Unau Pathum Phu Ah CDF-Kanpetlet Battalion Panga Le MDF An I Fonh.

CNDF, CDF-Mindat le PDF-Zoland nih an dirh mi “Unau Pathum Phu” ah CDF-Kanpelet tang ah a um mi Battalion panga le Maraland Defense Forces (MDF) an i fonh cang, tiah thawng kan theih. Unau Pathum Phu ah MDF an i fonhnak kong cu January 31 zing lei ah zapi theih ding in thawng an thanh i, January 31 zaanlei ah CDF-Kanpetlet zong nih Unau Pathum Phu ah an i fonhnak kong cathanh an chuah ve. CDF-Kanpetlet ah Battalion pasarih a um i, cu chung ah cun Battalion panga nih Unau Pathum Phu ah kan i fonh cang, tiah an thanh hi a si.

CDF-Mindat chung zong in Unau Pathum Phu ah a um mi le Chinland Council ah a um mi ti in phu hnih in an i ṭhen. Mindat peng, Circuit (4) le Circuit (11) ah a um mi mizapi nih Chinland Council ah i fonh kan duh an ti caah January 28 ah khan Chinland Council ah an i fonhnak kong cathanh an rak chuah. Unau Pathum Phu cu Chinland Council ah aa tel lo mi Chin hriamtlai phu pathum (CDF-Mindat, CNDF, PDF-Zoland) nih December 30 ah an rak dirh mi a si i, atu ah cun chungtel hriamtlai bu panga an i tel cang.

Leave a Comment

Leave a Reply

Your email address will not be published. Required fields are marked *