Chinland Cozah Ni 100 Chung Ṭuan Ding Rian Pawl A Fehter

Chinram chung ngandamnak, fimcawnnak, ukhruainak, runvennak, CDM kong tibantuk pawl biapi in kan ṭuan lai tiah an ti. Chinland cozah a voi khatnak meeting cu February 2-3 ah an tuah i ni 100 chung ah ṭuanchuah ding in an i hmaithlak mi rian pawl ceihhmainak le fehternak an ngei, tiah Chinland Council nih thawng a thanh. A ra lai mi ni 100 chung ah Chinram chung ukhruainak, mipi runvennak le phung lennak (rule of law) a um nakhnga biapi in kan ṭuan lai, tiah Chinland cozah nih a langhter.

Ukhruainak kong he pehtlai in mahle peng le tlang cio ah ukhruainak ṭuanvo a latu bu hna he pehtlai in rian ṭuan ding in timhtuahnak an ngei. NUG le Myanmar ramchung Federal Unit cozah hna he hmun khat ah rianṭuan ṭi ding in timhtuahnak an ngeih bang in UN, International Orginizations, Regional Organizations le innpa ram hna he zong rian an ṭuan ṭi khawh nakhnga ceihhmainak ngeih ding in timhtuahnak an ngei.

Cu lawng si lo in Chinram chung ngandamnak, fimcawnnak, mi bawmhnak le sersiam ṭhannak (Humanitarian and Reconstruction) le CDM a tuah mi hna kong hi hmual ngei ngai in ṭuan ding zong in an i hmaithlak fawn. Chinram chung ah mi bawmhnak rian a ṭuan cuahmah mi NGOs le INGOs hna he rianṭuan ṭi kho ding in ton biaruahnak zong kan ngei lai, tiah Chinland cozah nih timhtuahnak a ngei. Thawng dang relchap- Myanmar Kong ah “Kan Lungrethei Hringhran” tiah UNCS nih Chim, UN Security Council meeting ah Myanmar kong he pehtlai in chungtel zapi huap in biachahnak ngaingai an tuah kho ṭhan lo.

Chungtel ram 15 an umnak UN Security Council (UNSC) nih nizan February 5 ah khan Myanmar ram kong he pehtlai in kutka khar ceihhmainak an ngei ṭhan nain chungtel zapi huap in Myanmar kong ah biachahnak ngaingai an ngei kho lo. Sualnak ngei lo Myanmar rammi hna ralchanh in SAC ralkap nih vanlawng kahnak a tuah mi cung ah faakpi in duhlonak an langhter i, harnak a tong mi Myanmar rammi milu 18 million sin ah hnahnawhnak um lo te in bawmhnak phakter ding le President U Win Myint le Daw Aung San Suh Kyi tel in ramkhel thongtla vialte thlah ding in US, UK, France le a dang UNSC ram 6 nih hmun khat ah cathanh an chuah.

Asinain, Tuluk le Russia tel in a dang ram 4 nih cun SAC ralkap ralchanh in Myanmar kong ah zeihmanh chimrel mi an ngei. UNCS nih atulio Myanmar ram buainak kong ah “Kan lungre a thei hringhran” tiah a tlangpi in an langhter i, SAC ralkap nih ASEAN hnatlaknak panga a ṭuanchuah nakhnga an forhfial. UN nih a rak chiah mi Myanmar special palai Noeleen Heyzer cu 2023 ah a rianṭuan caan a dih cang caah a lawng mi Myanmar special palai hmunhma ah palai thar a rianrannak in chiah ding zong in UNSC ah ceihhmainak an ngei, tiah theih a si.

Leave a Comment

Leave a Reply

Your email address will not be published. Required fields are marked *