Chinmi Pa Pakhat Cu Ralkap Nih An Tlaih I Sing 10 In An Hlam Lo Ruangah An Thah

2022 August 15 – Sagsing ramṭhen, India-Myanmar ramri, Tamu ah Chin miphun a simi Ko Kim Pu cu August 13 ah SAC ralkap nih an tlaih i a chungkhar hna kha sing 10 in rak hlam uh tiah an ti hna. A chungkhar pawl tangka an har tuk lio a si caah an hlam kho zokzok lo i ralkap nih an thah tiah theih a si. Ko Kim Pu ruak cu sizung ah an rak lak ter hna i August 14 ah an vuai tiah Ko Kim Pu hawipa nih Khit Thit ah a chim.

An thahmi hi ka hawipa kum 33 a simi Kim Pu a si. August 13 ah ralkap nih an tlaih. Moeye lei ah thilri cawk dingin a kal lioah an tlaih. Ralkap nih a chungkhar kha sing 10 in an hlamter hna. Tangka an ngei lo i an chimmi nicaan ah an hlam khawh lo caah an thah.  Ko Kim Pu nih a nu, a nupi le a fapa pakhat a tantak hna” tiah a chim. Ko Kim Pu hi thil a zuarmi mi sawhsawh a si.

India-Myanmar ramri, Tamu ah Pyusawhtee le ralkap pawl an hrang tuk. Tangka a ngeimi hna inn kha meithal in an tlerh hna i an tangka an chuh hna tiah ” Ko Kim Pu hawipa nih a chim.crd- The Chinland Post. Thawng dang: Chin ramkulh, Hakha-Thantlang lampi ah a ummi Timit tiva hlei cu remh ṭhan ding in, SAC ralkap pawl cu an i zuam len nain remh an timnak thla khat le cheu hrawng tiang ah an remh kho rih lo.

SAC ralkap nih Timit tiva hlei remh ṭhan an timh ruang ah le, Thantlang camp thazaang chap an timhnak ah lampi ah kahdohnak tuah. Timit lam hi Hakha le Thantlang kar pehtlaihnak ah hman bik mi lampi a si caah Timit hlei a rawh hnu in SAC ralkap hna nih Hakha le Thantlang kar pehtlaihnak an tuah khawhlonak a sau ngai cang.

Timit hlei remhnak ding ca ah thilri phortu motor 27 cu June 29 ah Kalaymyo in an rak chuak nain, lampi ah tualchung ralkap hna nih voi tampi an kahdoh hna. Timit hlei pawng ah hin Chin ralkap; CNA, CDF-Zophei, CDF-Hakha, CDF-Thantlang, CDF-Lautu, CDF-Mara le CJDC phufonh nih an kahdoh hna i, SAC ralkap lei fak ngai in an hliamh hna, tiah theih a si.

SAC ralkap hna nih 2021 ah Thantlang khuapi cu an rak khangh i, kahdohnak ruang ah Hakha le Thantlang pehtlaihnak lampi Timit hlei cu tualchung hriamtlai phu nih an rak hrawh. Chin ralkap hna nih Timit hlei an rak hrawh lio ah cun hlei kap khat lei lawng a rak rawk i, 2022, July 28 ah tualchung hriamtlai phu nih a voi hnihnak an hrawh ṭhan caah Timit hlei cu kap hnih in a cim, tiah theih a si. Crd- the chin post

Leave a Reply

Your email address will not be published.